قىتاي ەكونوميكاسىنىڭ تابىستىلىعى ساپالى ءبىلىم بەرۋىمەن بايلانىستى - داريعا نازاربايەۆا

 بۇل تۋرالى بۇگىن ق ر پارلامەنتى ءماجىلىسى ءتوراعاسىنىڭ ورىنباسارى داريعا نازاربايەۆا ايتتى.

«قازىرگى الەمدە ءبىلىم بەرۋ جانە ەكونوميكا ءۇشىن كادرلار دايارلاۋ ماسەلەلەرى مەملەكەتتەردىڭ باسەكەگە قابىلەتتىلىگىنىڭ اسا ماڭىزدى فاكتورىنا اينالدى. كادرلار ءبارىن شەشىپ قانا قويمايدى. كادرلاردىڭ ساپاسى، ءبىلىم بەرۋ ساپاسى بۇگىنگى كۇنى ۇلتتىق قاۋىپسىزدىك ستراتەگياسىنىڭ ەلەۋلى بولىگى رەتىندە قاراستىرىلۋى ءتيىس» ، - دەدى ول «تەحنيكالىق جانە كاسىپتىك، جوعارى ءبىلىم بەرۋ جۇيەسىندە ەكونوميكا سالالارى ءۇشىن كادرلار دايارلاۋدىڭ ساپاسى مەن پەرسپەكتيۆالارى تۋرالى» پارلامەنتتىك تىڭداۋ بارىسىندا.

ول ەلىمىزدىڭ الدىنا 2050 - جىلى الەمنىڭ ەڭ دامىعان وتىز ەلىنىڭ قاتارىنا كىرۋ ماقساتىن قويعاندىعىن، ال وسى امبيتسيالى ماقساتقا قول جەتكىزۋدىڭ العاشقى ءارى باستى شارتى ادامي كاپيتالدى دامىتۋ ەكەندىگىن باسا ايتتى.

«دامىعان ەلدىڭ ءبارى دە عىلىمعا يەك ارتادى. وندا قىزمەت كورسەتۋ سەكتورى باسىم، ەڭبەك ونىمدىلىگى جوعارى بولادى. عىلىمي ءبىلىم مەن ونەركاسىپتىڭ جوعارى تەحنولوگيالىق سەكتورى ەكونوميكالىق ءوسىمدى قامتاماسىز ەتۋدە نەگىزگى رول اتقارادى. قازاقستان تاياۋداعى ون جىل ىشىندە ءوز دامۋىندا ساپالى سەكىرىس جاساپ قانا قويماۋى كەرەك. ەلىمىزگە وسكەلەڭ جانە ءبارىن قامتيتىن جاڭعىرتۋ ءىسى دە قاجەت. پرەزيدەنتىمىز مەملەكەتىمىز بەن ۇلتىمىزدىڭ ماقساتتارى مەن مىندەتتەرىن ناق وسىلاي تۇجىرىمداپ بەردى. بۇگىنگى وسى پارلامەنتتىك تىڭداۋدا الداعى 10, 15, 20 جىلعا ارنالعان ءبىلىم بەرۋ مەن ەكونوميكا ءۇشىن كادرلار دايارلاۋ جۇيەسىنىڭ ستراتەگياسى تۋرالى بىلىكتى دە كاسىبي اڭگىمە بولۋى ءتيىس دەپ سانايمىن» ، - دەدى د. نازاربايەۆا.

وسى رەتتە ۇلگى رەتىندە كورشى قىتاي مەملەكەتىنىڭ تاجىريبەسىن اتاعان د. نازاربايەۆا: «ەلدى الەمنىڭ ءىرى ەكونوميكاسىنا اينالدىرۋداعى قىتاي ەكونوميكالىق رەفورماسىنىڭ تابىستىلىعى بەلگىلى ءبىر دارەجەدە ءبىلىم بەرۋ جانە جوعارى مەكتەپتى زاماناۋي ساپالى رەفورمالاۋمەن بايلانىستى. قىتاي رەفورماسىنىڭ باستى ۇستانىمى - جاھاندىق جانە وڭىرلىك ەڭبەك نارىعى قاجەتتىلىگىن ەسكەرۋ» ، - دەدى.

ونىڭ اتاپ وتۋىنشە، قازاقستانداعى بيزنەستىڭ كادرلار دايارلاۋ ۇدەرىسىنە قاتىسۋى وتە تومەن بولىپ وتىر. ماسەلەن، بۇگىنگى تاڭدا جوعارى ءبىلىم بەرۋ جۇيەسىندە جۇمىس بەرۋشىلەردىڭ گرانتتارى بويىنشا نەبارى 0,8 پايىز ستۋدەنت ءبىلىم الۋدا.

«دامىعان ەلدەردە بۇل كورسەتكىش 30 پايىزعا جەتەدى» ، - دەدى د. نازاربايەۆا.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى