مەملەكەتتىك ءتىل مارتەبەسىن ارتتىرماق

ۇيىمداستىرۋشىسى - الماتى قالاسى اكىمدىگىنىڭ تىلدەردى دامىتۋ، مۇراعاتتار جانە قۇجاتتاما باسقارماسى.

كوزدەلگەن مىندەت - مەملەكەتتىك ءتىل ساياساتىن ناسيحاتتاپ جۇرگەن جەكەلەگەن اۆتورلاردىڭ جۇمىسىنا وڭ باعا بەرۋ جانە كوتەرمەلەۋ.

ال شارتتارىنا توقتالساق، بايقاۋعا ءتىل ساياساتى، مەملەكەتتىك ءتىل احۋالى تۋرالى وتكىر دە وزەكتى ماتەريالدار جولدانۋى ءتيىس. جۇزدەن جۇيرىك شىققان جەڭىمپازدار «باسپاسوزدەگى ۇزدىك جۋرناليست» ، «ينتەرنەت-سايتتاعى ۇزدىك جۋرناليست» ، «ۇزدىك تەلەجۋرناليست» ، «ۇزدىك راديوجۋرناليست» اتالىمدارى بويىنشا ماراپاتتالادى.

قازىلار القاسى 2013 - جىلعى 1 - شىلدەدەن بەرى قازاق جانە ورىس تىلدەرىندە جاريالانعان گازەت-جۋرنال جانە سايت ماتەريالدارىن، ەفيردەن بەرىلگەن تەلە-راديو حابارلاردى قامتيدى.

بايقاۋعا قاتىسۋ ءۇشىن جەكە اۆتورلار الماتى قالاسىنىڭ تىلدەردى دامىتۋ، مۇراعاتتار جانە قۇجاتتاما باسقارماسىنا ءوتىنىش بەرەدى. سونداي-اق جاريالانعان ونىمدەرىن (گازەت، جۋرنال، سايت بەتتەرى، بەينە جانە اۋديوجازبالار) وتكىزەدى.

شارا ءباسپاسوز كۇنى قارساڭىندا قورىتىندىلانادى. جۇلدەلى ءبىرىنشى، ەكىنشى جانە ءۇشىنشى ورىنداردى يەلەنگەندەرگە ارنايى ديپلومدار مەن اقشالاي جانە باعالى سىيلىقتار تاپسىرىلادى. قالعان قاتىسۋشىلارعا العىس حاتتار مەن ەستەلىك سىيلىقتار بەرىلەدى.

ءامىرلان ماۋلەن

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى