ءمىن ىزدەۋ

باسقا ۇلت بولسا، ءسوز شىعىن قىلماس تا ەدىم، ءوزىمىزدىڭ قازاق ايەلىنىڭ قىلىعىنا قايران قالدىم.

ناعىز «ءوز بەتىن اياماعان، كىسى بەتىن شيەدەي ەتەدى» دەگەننىڭ كەرى. ءبىزدىڭ قوعامدا بىرەۋدىڭ كەمشىلىگىن، ءمىنىن ءسوز ەتۋ كەڭ ەتەك العان. ونى ايتۋدى ءتىپتى، باتىلدىق سانايتىندار دا جوق ەمەس. ناتيجەسىندە ءسوز كوپ، ءىس از. ال كىسىنىڭ ءمىنىن بەتىنە باسۋ - كورگەنسىزدىكتەن باسقا ەشتەڭە ەمەس.

ءبىر دانىشپان ورتاسىندا كىشكەنە عانا قارا نۇكتەسى بار ۇلكەن اق قاعازدى شاكىرتتەرىنىڭ الدىنا جايىپ تاستايدى دا، ولاردان نە كورىپ تۇرعاندارىن سۇرايدى. «كىشكەنە قارا نۇكتە كورىپ تۇرمىز»، - دەيدى شاكىرتتەر جامىراسا. عۇلاما باسىن شايقاپ: «ياپىر-اي، كولدەي قاعازدى كورمەي، ورتاسىنداعى كىشكەنە عانا داقتى كورسەتكەندەرىڭە تاڭمىن. بۇل ادەتتە بىرەۋدىڭ كەمشىلىگىن كورگىش ادامدارعا ءتان قاسيەت بولسا كەرەك. ەستەرىڭىزدە بولسىن، اۋەلى ءومىردىڭ جاقسى جاقتارى مەن ادامنىڭ ۇنامدى ءىس- ارەكەتتەرىن كورە ءبىلۋدى ۇيرەنىڭدەر»، - دەپ ۇلاعاتتى ءسوز ايتقان ەكەن.

شاكارىم اتامىزدىڭ دا ويى وسىمەن ساباقتاس:

«سەن بىرەۋدىڭ ايىبىن اشپا،

ءتۇن سىقىلدى پەردە تارت.

كۇن سىقىلدى اشا بەرمە،

جەر ءجۇزىنىڭ ءار سىرىن».

بۇرىنعىلاردان قالعان «ءبىلىمدى ادام ءار نارسەنىڭ بايىبىن ايتادى، ءبىلىمسىز ادام باسقانىڭ ايىبىن ايتادى» دەگەن اتالى ءسوز دە وسى ويدى تولىقتىرعانداي. ءاسىلى، باسقانىڭ ايىبىن جاسىرا بىلگەننىڭ مارتەبەسى قاشان دا ۇلىق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى