قازاقستان مەن ازەربايجان اسكەري- تەحنيكالىق ىنتىماقتاستىعىن نىعايتادى
بۇل تۋرالى باكۋدە وتان قورعاۋشىلار كۇنىن مەرەكەلەۋگە قاتىستى وتكەن سالتاناتتى قابىلداۋدا ق ر- دىڭ ازەربايجانداعى ەلشىلىگىنىڭ اسكەري اتتاشەسى الماس بازاربايەۆ ايتتى.
ونىڭ سوزىنە قاراعاندا، ازەربايجان مەن قازاقستان تەڭىز قاۋىپسىزدىگى سالاسىندا ىنتىماقتاستىقتى دامىتۋعا نيەتتى جانە وسى ماسەلە بويىنشا قازىر سايكەس قۇجاتتار ازىرلەنۋدە.
سونىمەن بىرگە مامىر ايىنىڭ سوڭىندا قازاقستاننىڭ قورعانىس مينيسترلىگىنىڭ جانە "Kazakhstan Engineering" قورعانىس كاسىپورنىنىڭ وكىلدەرى باكۋگە كەلەدى دەپ كۇتىلۋدە. ولار ەكىجاقتى اسكەري- تەحنيكالىق ىنتىماقتاستىقتى دامىتۋ تۋرالى كەلىسسوزدەر جۇرگىزەدى.
ەلشىلىكتىڭ اسكەري اتتاشەسىنىڭ سوزىنە قاراعاندا، قازىر جۇمىسشى توپتار دەڭگەيىندە ازەربايجاننىڭ قازاقستاندا قۇراستىرىلاتىن قازاقستاندىق- ەۋروپالىق وندىرىستەگى "Eurocopter EC145" تىكۇشاقتارىن ساتىپ الۋ مۇمكىندىگى جايلى كەلىسسوزدەر جۇرگىزىلىپ جاتىر.
