استاناداعى ۇلتتىق مۇراجايعا تولە ءبيدىڭ شاپانى مەن قازاق حاندارىنىڭ تۋ باسى اكەلىندى- فوتو
شەكپەندى تولە ءبيدىڭ قوجامجار بالاسىنان تاراعان ۇرپاقتارى وسى كۇنگە دەيىن ساقتاپ كەلگەن. سونىڭ قايتا جاساقتالعان كوشىرمەسى بۇگىن مۇراجايدىڭ جادىگەرلەر قورىنا كەلىپ قوسىلدى.
«سونىمەن قاتار مۇراجايعا الماتى وبلىسىنان بىرەگەي قازاقتىڭ كيىز ءۇيى، جامبىل وبلىسى جالعىز وبا قورعانىنان التىن بۇيىمدار جانە پاۆلودار، سولتۇستىك قازاقستان، اقتوبە وبلىستارىنان قۇندى جادىگەرلەر، اندرونوۆ داۋىرىنەن جەتكەن تاريحي قۇندىلىقتار ءتۇسىپ جاتىر. بۇل جادىگەرلەر ءبىزدىڭ مۇراجايىمىزدان ويىپ تۇرىپ ورىن الادى. مۇراجايعا قويىلعان تاريحي قۇندىلىقتار قازاقستاننىڭ وتكەنىن پاش ەتەتىن بىردەن- ءبىر جادىگەرلەردىڭ قاتارىنا قوسىلدى دەۋگە بولادى» ، - دەيدى ق ر ۇلتتىق مۇراجايىنىڭ ديرەكتورى دارحان مىڭباي.
«بۇل تەك قانا ءبىر ساندىقتا جاتپاسىن، ەلدىڭ كوز قۋانىشى بولسىن دەپ، كەشەگى ءبىزدىڭ ەل، ۇلكەن ءبىر مەملەكەت بولعانىمىزدى، ونىڭ تۋى بولعانىن ءبىلدىرۋ ماقساتىندا وسى ءبىر قۇندى زاتتى استاناداعى ۇلكەن ورداعا اكەلىپ وتىرمىز. مەن ءاز تاۋكە حاننىڭ توعىزىنشى ۇرپاعىمىن. اتادان بالاعا مۇرا بولىپ كەلگەن قارا شاڭىراقتا وسى تۋ بەرىلىپ وتىرعان. حاننىڭ ۇرپاعى بولعاندىقتان، وسى تۋدىڭ باسى مەنىڭ وتباسىمدا قالعان. ءبىز بۇل تۋدى ەڭ ءبىرىنشى قۇندى زات رەتىندە تورىمىزدە، اتالار اماناتى، كوزىڭ قاراشىعىنداي ساقتاپ كەلدىك. ونىڭ رەسمي اتاۋى «حاندار تۋى» ەكەنى بەلگىلى، كەيبىرەۋلەر ونى جوشى حاننىڭ تۇسىنان كەلەدى دەيدى، ەندى ءبىرى ونى تاۋكە حاننان كەلە جاتقان تۋ دەسەدى» ، - دەيدى قازاق حاندارىنىڭ تۋ باسىن الىپ كەلگەن حان تاۋكەنىڭ تىكەلەي ۇرپاعى بەكايدار امىرە.
عالىم مۇحتار قوجانىڭ بەرگەن توپتاماسىندا تۋ باسى مەتاللدان جاسالعان زات، ءتۇسى - قويۋ قوڭىر، كەيبىر قىرلارىندا سارعىش بولىپ كەلەدى. ونىڭ قۇرامىن ارنايى زەرتتەۋ قۇرالدارىمەن انىقتاۋ قاجەت. جالپى بيىكتىگى - 21,5 س م، جوعارعى ۇستىڭگى بولىگى كۇمبەز ۇلگىسىندە جاسالعان. كۇمبەز تارىلىپ بارىپ، تۋدىڭ اعاشىنا كيىلەتىندەي ەتىپ جاسالعان ۇڭعىعا وتىرعىزىلادى.
ايتا كەتەيىك، ۇلتتىق مۇراجاي 2014 - جىلدىڭ 6 -شىلدەسىندە اشىلادى دەپ كۇتىلۋدە. مۇراجايدىڭ جالپى اۋماعى 74 مىڭ شارشى مەتردى قۇرايدى، مۇندا 11 زال جاساقتالىپ جاتىر. ونىڭ ىشىندە ەرتە زامانعى جانە ورتا عاسىرداعى، جالپى تاريح، ەتنوگرافيا، تاۋەلسىز قازاقستان تاريحى، استانا تاريحى، زاماناۋي ونەر زالدارى، تاقىرىپتىق كورمەلەرگە ارنالعان 2 زال بار.
اۆتور: جاسۇلان جولدىبايەۆ 
