الەۋمەتتىك جەلىلەر وليمپياداشىلارعا تالاسىپ جاتىر
Twitter الەۋمەتتىك جەلىسى مەن NBC تەلەارناسى وليمپياداعا ارناپ ارنايى جوبا قۇراستىردى. عالامتورداعى ارنايى پاراقشادا سپورتشىلار جازعان پىكىرلەر مەن ولاردىڭ وتباسىنا، باپكەرلەرىنە، كوماندالارىنا جانە جانكۇيەرلەرىنە قاتىستى مالىمەتتەر ەنگىزىلەدى. بىراق lenta.ru-دىڭ حابارلاۋىنشا، عالامتورداعى وليمپيادالىق پاراقشاعا تەك اقش تەرريتوريياسىندا عانا كىرۋگە مۇمكىنشىلىك بار. سونداي-اق ارنايى جوبانى Twitter-دىڭ موبيلدى نۇسقا ارقىلى دا پايدالانۋعا بولادى. ميكروبلوگتار سەرۆيسى مەن تەلەارنانىڭ بىرلەسكەن جوباسى جايلى اقپاراتتى ەڭ بىرىنشى بولىپ، The Wall Street Journal گازەتى 22 شىلدە كۇنى حابارلادى. سونىمەن قاتار گازەت قىزمەتكەرلەرى بۇل سەرىكتەستىكتىڭ كوممەرسييالىق جوبا ەمەس ەكەنىن ايتىپ وتىر. مامانداردىڭ پىكىرىنشە، وليمپيادا كەزىندەگى جارنامادان-اق كىرىس كوزى اناعۇرلىم ۇلعايادى. ايتا كەتەر جايت - اتالعان جوبادان ءوزگە لوندونداعى وليمپياداعا ارناپ Facebook, Google جانە YouTube جەلىلەرى دە ارنايى پاراقشالار اشىپ جاتىر.
