ايان وتەپبەرگەن: كينوداعى تايماس سياقتى قىزعانشاقتىعىم جوق
- ايان، «جاۋجۇرەك مىڭ بالاعا» تۇسكەننەن كەيىن ءومىرىڭ وزگەردى مە؟ بىردەن جارق ەتىپ «جۇلدىز» بولۋ قيىندىق تۋدىرمادى ما؟
- ايتارلىقتاي ەشتەڭە وزگەرگەن جوق. قۇدايعا شۇكىر، «جۇلدىز اۋرۋىنان» اۋلاقپىن. تەك الەۋمەتتىك جەلىلەردەگى دوستارىمنىڭ سانى ارتىپ، كوشەدە ادامدار تانيتىن بولدى. مۇمكىندىكتەر اشىلدى.
- قانداي؟
- ەندى جۇرت تانىعان سوڭ دەگەنىم عوي.
- قولتاڭبا سۇراپ، سۋرەتكە تۇسەيىك دەيتىندەر كوپ بولار...
- بارشىلىق. وتكەندە بىر بەيتانىس اپاي حابارلاسىپ، «ۇلىمنىڭ اتىن تايماس دەپ قويدىم» دەيدى. جۇرت ەلەپ جاتسا، قۋانىپ قالاسىڭ. ال، دوستارىم «تايماس دەگەن يتتىڭ اتى عوي» دەپ قالجىڭدايدى...
- قىزدار كوپ مازالاي ما؟
- ءيا. تۇندە حابارلاسىپ، ۇندەمەي تۇراتىندار كەزدەسەدى.
الايدا، ءبارى ماعان «قىرىلىپ قالدى» دەپ ايتپايمىن. مەن سىزگە ءبىر قىزىقتى ايتايىن. تۇساۋكەسەردەن سوڭ جانىما ءبىر قىز كەلىپ سۋرەتكە تۇستى دە، بەتىمە قاراپ تۇرىپ: «مەن سەنى جەك كورەمىن» دەدى. «وندا نەگە سۋرەتكە تۇسەسىڭ» دەگەن ساۋالىما: «سەنى ەمەس، ويناعان كەيىپكەرىڭدى جەك كورەمىن» دەيدى.
- قازىر نەمەن اينالىسىپ ءجۇرسىڭ؟
- ۇيقىنىڭ «نورماسىن» ورىنداۋدامىن (كۇلىپ). جازعى دەمالىستامىز. رۇستەم ابدىراشەۆتىڭ «بالالىق شاعىمنىڭ اسپانى» فيلمىنىڭ جالعاسىنا تۇسپەكشىمىن. ءتۇسىرىلىمى جاقىندا باستالادى. سوسىن بولات اتابايەۆتىڭ جۋىردا اشىلاتىن «اقساراي» تەاترىنا جۇمىسقا تۇرسام دەپ ويلاپ ءجۇرمىن. ايتپاقشى، كەشە العاش رەت «ەلارناداعى» «جارايسىڭدى» جۇرگىزدىم.
- بەلگىلى اكتەر مەڭتاي وتەپبەرگەن تۋىسىڭ ەمەس پە؟
- جوق! كوبى سولاي ويلاپ ءجۇر. رەجيسسەر سەرىك وتەپبەرگەننىڭ دە تۋىسى قىلىپ قويىپتى. بار بولعانى - تەگىمىز ءبىر. سول عانا.
- كەيىپكەرىڭ تايماسپەن قانداي ۇقساستىقتارىڭ بار؟
- تەز شەشىم قابىلداعىشتىعىم. جانە قىزۋقاندىمىن.
- تايماس سەكىلدى قىزعانشاقسىڭ با؟
- قۇداي ساقتاسىن! ەشكىمنىڭ جەتىستىگىن قىزعانبايمىن.
- وزىڭە ۇنامايتىن قانداي مىنەزىڭ بار؟
- ەرىنشەكپىن.
- دوستارىڭ كوپ پە؟
- اللاعا شۇكىرلىك. دوستىڭ ەكى ءتۇرى بولادى ەكەن، ءبىرى - كەۋدەدەن جان شىققانشا، ەكىنشىسى - مۇرىننان قان شىققانشا. اسىلحان، نۇرجىگىت سىندى دوستارىم قاشان دا قاسىمنان تابىلادى.
- ورازا ۇستادىڭ با؟
- بىرنەشە جىل قاتارىنان ۇستاپ كەلگەنمىن. بيىل وكىنىشكە قاراي، ۇستاي المادىم.
- الەۋمەتتىك جەلىلەردە ءوزىڭ وتىراسىڭ با؟
- فەيسبۋك، تۋيتتەر، ۆكونتاكتە جەلىلەرىندەگى پاراقشالاردى ءوزىم اشقانمىن. ال، «مەيل.رۋ»-داعى «الەم» مەنىكى ەمەس.
- كىتاپ وقۋ نەمەسە فيلم كورۋ. قايسىسىن تاڭدايسىڭ؟
- ەكەۋىن دە. كينوتەاترعا ءجيى بارىپ، پرەمەرالاردى جىبەرمەۋگە تىرىسامىز. كىتاپ وقىعاندى، اسىرەسە دەتەكتيۆتى جانردى جاقسى كورەمىن. ماحاببات تاقىرىبى دا ماعان الىس ەمەس. ءسابيت مۇقانوۆتىڭ «ءمولدىر ماحابباتىن» تامامدادىم.
- بيلىككە يە بولساڭ، نە نارسەگە تىيىم سالار ەدىڭ؟
- ەڭ الدىمەن، جەمقورلىققا. قىزىپ كەتسەم، قازىر ءبىراز پروبلەمالاردى ايتىپ كەتۋىم مۇمكىن (كۇلىپ).
- گيننەستىڭ رەكوردتار كىتابىنا ەنۋ ءۇشىن نە جاسار ەدىڭىز؟
- (ويلانىپ) تاڭ اتقانشا دومبىرامەن ءان سالاتىن شىعارمىن.
- ال، ءبىز بىلمەيتىن قانداي ونەرىڭ بار؟
- ءان ايتامىن. دومبىرا، گيتارا، فلەيتا، شاڭقوبىز، فورتەپيانودا ويناي الامىن.
- «ۋاقىت كەمەسى» قولىڭا تۇسسە، قاي داۋىردە ءومىر سۇرگىڭ كەلەدى؟
- XVI عاسىرداعى وربۇلاق شايقاسىن ءوز كوزىممەن كورگىم كەلەدى. ۇلتاراقتاي جەر ءۇشىن كۇرەسكەن بابالارىمنىڭ قاتارىندا مەن دە ءوز ۇلەسىمدى قوسار ەدىم.
- اڭگىمەڭە راحمەت!
اڭگىمەلەسكەن ماقپال جۇماشوۆا
