زۇلفيا چينشانلو: الەمدىك رەكوردپەن جەڭىسكە جەتۋدى ارماندايمىن

«مەن سپورتتاعى بارلىق جەتىستىكتەرىمە قازاقستاندا جەتتىم. ازامات بولىپ قالىپتاسۋىما وسى مەملەكەتتىڭ ىقپالى ءتيدى. سوندىقتان، قازاقستاندى، قازاق ەلىن ءوز جۇرتىم دەپ قابىلداۋعا قۇقىم بار. مەن جەڭىسكە جەتكەندە قازاق بايراعى كوتەرىلىپ، ءانۇرانى وينالادى. سوندا كەۋدەمدى الاپات قۋانىش بيلەيدى. قازاقستاننىڭ اتىن الەمگە تانىتۋعا ۇلەسىم بار ەكەندىگى جۇرەگىمدى جىلىتادى». زۇلفيا ءبىر كەزدەسۋدە وسىلاي دەگەن.

راسىندا، سولاي. ونىڭ تاريحي وتانى - قىتايدا دەنە شىنىقتىرۋ ساباعىندا باپكەرلەر كەلىپ، ءارتۇرلى دەنە جاتتىعۋلارىن جاساتىپ، سودان سوڭ ءارقايسىنىڭ يكەمىنە قاراي ۇيىرمەلەرگە بولەر ەكەن. زۇلفيا چينشانلو مەن مايا مانەزا اۋىر اتلەتيكاعا وسىنداي ىرىكتەۋدەن كەيىن تۇسكەن. قىتايدا ادام قۇمىرسقادان كوپ. ءبىر سپورت تۇرىمەن ميلليونداعان بالا اينالىسادى. سونىڭ بارىنەن وزعانى عانا قۇراماعا قابىلدانادى. قۇراماعا قابىلدانۋ دەگەن دە الەم چەمپيوناتى، وليمپيا ويىندارىنا قاتىسۋعا مۇمكىندىك بەرە بەرمەيدى. ماسەلەن، جاپونيادا ەركىن كۇرەستە يچو كاوري دەگەن اتاقتى بالۋان قىز بار. 5 دۇركىن الەم چەمپيونى، 2 دۇركىن وليمپيا ويىندارىنىڭ چەمپيونى. داڭقتى يچو تۇرعاندا باپكەرلەر جاستارعا تاۋەكەل ەتە المايدى. ءار سالماقتا كاوري سەكىلدى قۇرامادان ويىپ ورىن العان ساقا بالۋاندار كوپ. قىتايدا دا سولاي.

    زۇلفيا چينشانلو مەن مايا مانەزاعا قازاقستان بولماعاندا قىتايدىڭ قۇراماسىنا قابىلدانۋىنىڭ ءوزى ەلەستەي كورىنەتىنى سول. ءبىر كۇنى جاتتىعۋعا قازاقستان اۋىر اتلەتيكا قۇراماسىنىڭ باس باپكەرى الەكسەي ني كەلگەن. زۇلفيا مەن ماياعا تاڭداۋ جاساعان. سودان سوڭ ەكى قىز كانىگى باپكەر ەنۆەر تۇركەلەريدىڭ تالىمىندە ساباق الدى. تالاي وليمپيادا چەمپيوندارىن دايىنداعان باپكەر كەشە عانا ەلەۋسىز جۇرگەن ەكى دۇنگەن قىزىن الەمدىك جارىستاردا ولجاسىز قايتپايتىن دۇلدۇلدەرگە اينالدىردى.

    14 جاسىندا قازاق توپىراعىن باسقان زۇلفيانىڭ ەڭ العاشقى ءىرى جارىسى قازاقستاننىڭ جازعى سپارتاكياداسى بولعان. جۇلقي كوتەرۋدەن-اق قارسىلاستارىنان 20 كيلو الدا بولدى. قوسسايىس قورىتىندىسى بويىنشا زۇلفيا چينشانلو ەكىنشى ورىن العان ساۋلە ساۋىتبەكوۆادان 50 كيلو وزىپ كەتكەن. 16 جاسىندا وڭتۇستىك كورەيادا وتكەن الەم چەمپيوناتىنا قاتىستى. 53 كيلو سالماقتا سىنعا تۇسكەن زۇلفيا قوسسايىس قورىتىندىسى بويىنشا 219 كيلو كوتەرىپ، باس بايگەنى جەڭىپ الدى. وسىلايشا، قازاقستاندىق قىز ەڭ جاس الەم چەمپيونى رەتىندە گيننەستىڭ رەكوردتار كىتابىنا ەندى.

      پاريجدە وتكەن الەم چەمپيوناتىندا ەكىنشى مارتە الەم چەمپيونى اتاندى. سەرپە كوتەرۋدە 130 كيلو كوتەرىپ، الەمدىك رەكوردتى جاڭارتتى. ەلباسى ارنايى جەدەلحات جىبەرىپ قۇتتىقتاعاندا، زۇلفيا قاتتى تولقىعان. بەيجىڭ وليمپياداسى مەن پاريجدە وتكەن الەم چەمپيوناتىنىڭ قورىتىندىسى قازاقستان اۋىر اتلەتيكاسىنىڭ داڭقىن الەمگە جايدى. بۇرىن كۇرەس پەن بوكستان نەسىبە تەرىپ جۇرگەن ەلىمىزدە اۋىر اتلەتيكا نومىرى ءبىرىنشى سپورتقا اينالعان.

    - قىتايدا الەم چەمپيونى بولامىن دەۋدى ارمانداۋعا قورقاتىنمىن، - دەيدى زۇلفيا. - تالاي جارىستارعا قاتىسىپ كوردىم. ءوزىمدى ءوزىم پسيحولوگيالىق جاعىنان جەڭە المايتىنمىن. بيىك ناتيجە كورسەتۋىم مۇمكىن ەمەستەي كورىنەتىن. العاش رەت قازاقستان تۋى استىندا الەم چەمپيونى بولعانىم دا ەلەستەي كورىندى. قازىر ەشكىمنەن سەسكەنبەيمىن. لوندون وليمپياداسىندا التىن الۋدى ارمانداپ ءجۇرمىن. كۇشىم جەتسە، الەمدىك رەكوردپەن. وسىلايشا، مەنى بيىككە كوتەرگەن قازاق ەلىن قۋانىشقا بولەگىم كەلەدى.

زۇلفيانىڭ جۇيكەسى تەمىردەي. مىقتى سپورتشىعا شەشۋشى كەزەڭدە ەڭ كەرەك قاسيەت وسى. ەلدى جەڭىستەرىنە ۇيرەتكەن ءوزى. سۇيىكتى قىزىنان جانكۇيەرلەر دە ۇلكەن جەڭىس كۇتەدى. 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى