مايا مانەزا: جەڭىسكە جولىمدى اشقان - قازاقستان

  زۇلفيا چينشانلو مەن ارلي شونتەي التى كەزەگىندە ءمۇلت كەتكەن جوق. بەيجىڭ وليمپياداسىنىڭ كۇمىس جۇلدەگەرى ولگا نەكراسوۆامەن جولداماعا تالاسقان مايا مانەزا العاشقىدا ابدىراپ قالدى. ولگا جۇلقي كوتەرۋدە باقانداي جەتى كيلوعا ۇزاپ كەتتى. الەمنىڭ قوس دۇركىن چەمپيونىنىڭ حالىقارالىق جارىستاردا ءدىر ەتپەگەن جۇرەگى ەلىشىلىك جارىستاعى باسەكەگە شىداي الماعانداي. سەرپە كوتەرۋدە دە ءبىر كەزەگىن الا الماعان.

     مايا ۆا-بانككە كەتتى. الەمدىك رەكوردتى سۇرادى. ساراي ءىشى سىلتىدەي تىنعان. ءولى تىنىشتىق. وزىنە ءتان بيازى جۇزىمەن كۇلىمسىرەگەن، جۇرتقا باس يگەن مايا زىلتەمىردىڭ ەكى قۇلاق تۇسىنان قىلقىندىرا ۇستادى دا، ءبىر دەممەن كەۋدەسىنە قوندىردى. بار كۇشىن قوس بىلەككە جيىپ، وڭ اياعىن ءسال ارتقا بەردى دە شىرەنە اسپانعا اتتى. وسى چەمپيوناتقا ارنايى كەلگەن سپورت جانە دەنە تاربيەسى ىستەرى اگەنتتىگىنىڭ ءتوراعاسى تالعات ەرمەگيايەۆ ورنىنان تۇرىپ كەتتى. ساراي دا ءبىر كىسىدەي تۇرىپ، قۇرمەت كورسەتتى.

     سالماعىن قۋمادى دەگەنىمەن، الەمدىك رەكوردتىڭ اتى - الەمدىك ەڭ وزىق مەجە. مايانىڭ سىن ساعاتتا ەرلىك كورسەتىپ جۇرگەنى ءدال بۇگىن ەمەس. بەيجىڭ وليمپياداسىندا ءبىر رەت شىقتى دا، جاتتىعۋدا العان جاراقاتىنا بايلانىستى باپكەرلەر ءارى قاراي رۇقسات بەرمەگەن. كەيىن ەستىدىك، ەڭىرەپ تۇرىپ جىلاپتى. كوز جاسى كول بولاتىنداي بار. وسى سالماقتا وليمپيا ويىندارىنىڭ چەمپيونى بولعان قىز مايانىڭ جاتتىعۋدا كوتەرىپ جۇرگەنىنەن ەكى-ءۇش كەلىگە كەم كوتەرگەن.

     "بۇيتكەن سپورتى قۇرىسىن، اۋىر اتلەتيكادان مۇلدە كەتەمىن»، دەيدى اشۋعا بۋلىققان قىز. باپكەرلەر ارەڭ ساباسىنا تۇسىرگەنگە ۇقسايدى. ودان كەيىن وڭتۇستىك كورەيادا وتكەن الەم چەمپيوناتىندا رەسەيدىڭ شاپپاي بايگە الادى دەگەن ءدۇلدۇلى سۆەتلانا سارۋكايەۆامەن بىردەي سالماق كوتەردى. قوس سايىس قورىتىندىسى بويىنشا، 246 كيلو. مۇندايدا سالماعى جەڭىلى جەڭىمپاز. العاشقى ءىرى جەڭىس ماياعا وسىلاي كەلگەن.

    كەلەسى جىلى ەكىنشى مارتە الەم ءتاجىن كيدى. بۇل جولى ەكىنشى ورىنعا شىققان تۇركيالىق سيبەك سيمسەك ءبىزدىڭ قىزدان باقانداي 7 كيلو كەيىن قالىپ كەتتى.

      پاريجدە ءۇشىنشى رەت الەم چەمپيونى بولۋعا كۇشى ابدەن جەتەتىن ەدى. قازاقستان - ۇلان-بايتاق بولعانىمەن، حالقى ميللياردتارمەن، جۇز ميلليوندارمەن ەسەپتەلەتىن مەملەكەتتەر ءۇشىن الاقانداي ەل. زۇلفيا چينشانلو الەم چەمپيونى بولدى. يليا يلين الەم چەمپيونى بولدى. سۆەتلانا پودوبەدوۆا دا رەسەيلىك زابولوتنايا جانە ەۆستۋحينامەن التىنعا تالاسىپ جاتىر. مۇندايدا تورەشىلەر قولدان كەلگەنشە اياقتان شالادى. مايانى وڭدىرماي شالدى. التىندى داۋسىز الاتىن تۇستا كوتەرگەن سالماعىن ەسەپتەمەي تاستاعان. ادەيى جاسادى ما، ابايلامادى ما، زىلتەمىردىڭ ءبىر باسىنا 2،5 كيلو ارتىق كىر تاسىن سالىپ قويعان. ءۇشىنشى التىن قولدان وسىلايشا سۋسىپ كەتتى.

     تورەشىلەردىڭ ەڭبەگىن كوپە-كورىنەۋ جەگەنى جانىنا ايازداي باتقانىمەن، لوندون ءۇشىن جاقسىلىققا جورىعان. «اققا قۇداي» جاق دەگەن.

      ءبىزدىڭ مايا - كەرەمەت قىز. مىنەزگە باي. ونگەن، وسكەن ورتاسىنىڭ قادىرىن بىلەدى. قازاقستاندى وتانىم دەپ تانيدى.

    - قىتايدا كوپ جارىستارعا قاتىستىم. قاي سپورتشى بولسا دا الەم چەمپيونى بولۋدى ارماندايدى. الەم چەمپيونى بولۋ-بولماۋىما كوزىم جەتپەيتىن. قىتاي - ۇلى مەملەكەت. قۇراما باپكەرلەرىنىڭ كوزىنە ءتۇسۋ قيىن ەدى. قازاق بايراعى ماعان قۇت بولدى. باسقا جارىستاردى ايتپاعاندا، ەكى رەت الەم چەمپيونى اتاندىم. لوندوننان كۇتكەنىم كوپ. جۋىردا ءبىزدى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ قابىلدادى. جاقسى سوزدەر ايتتى. سول سەنىمگە لايىق بولۋىمىز كەرەك، - دەيدى م.مانەزا.

زۇلفيا دا، مايا دا قازاقستانعا كوكورىم شاعىندا كەلدى. ءىرى جەڭىستەرى جوق بولاتىن. بولماس پا دا ەدى. جەڭىسكە جەتكىزگەن - قازاقستان. سپورتشىلارعا بار جاعداي جاسالدى. الەكسەي ني، ۆيكتور ني، ەنۆەر تۇركەلەري سياقتى باپكەرلەر بار بىلگەن، توقىعاندارىن بويلارىنا ءسىڭىردى. مەملەكەتتىك قولداۋدان كەندە بولعان كەزى جوق. ولاردىڭ جەڭىسى قازاققا ەشتەڭە بەرمەيدى دەپ قازاقستاننىڭ الەمدەگى ابىرويىن ويلامايتىندار ايتاتىن شىعار. ال، زۇلفيا مەن مايا وزدەرىن قازاقستاننان تىس ەلەستەتە المايدى. تاعدىر تالايىمىز وسى ەلمەن بايلانىستى دەپ بىلەدى.                           

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى