نەسىپبەك ايت ۇلى
نەسىپبەك ايت ۇلى 1950- جىلى 22- قىركۇيەكتە قىتايدىڭ تارباعاتاي ايماعى، شاۋەشەك اۋدانىنا قاراستى تەرەكتى اۋىلىنىڭ اپيىندىبۇلاق دەگەن جەرىندە دۇنيەگە كەلگەن. 1962- جىلى اتا-اناسىمەن اتامەكەنگە ورالىپ، ورتا مەكتەپتى بۇرىنعى سەمەي وبلىسى، شۇبارتاۋ اۋدانى، بارشاتاس اۋىلىندا بىتىرگەن. ەڭبەك جولىن شۇبارتاۋ اۋداندىق «جاڭا ءومىر» گازەتىندە باستايدى. 1974- جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن.
1974-1984 ج ج. «بالدىرعان» جۇرنالى پوەزيا ءبولىمىنىڭ مەڭگەرۋشىسى، «جالىن» باسپاسىندا رەداكتور، 1984-1994 ج ج. قازاقستان جازۋشىلار وداعىندا ادەبي كەڭەسشى، 1995-1996 ج ج. «اقىن» قاۋىمداستىعىنىڭ ديرەكتورى، 1997-2001 ج ج. «قازاق ادەبيەتى» گازەتىندە سىن ءبولىمىنىڭ، «جۇلدىز» جۇرنالىندا پوەزيا ءبولىمىنىڭ مەڭگەرۋشىسى بولىپ قىزمەت ىستەدى. قازىر استاندا شىعاتىن «التىن تامىر» ادەبي-مادەني، قوعامدىق جۇرنالىنىڭ باس رەداكتورى. «پاراسات» وردەنىمەن ماراپاتتالعان.
«قوزىكوش»، «جۇرەكتەگى جاڭعىرىقتار»، «اكە تۋرالى سىر»، «جاڭبىر ءانى»، «تۇندەلەپ ۇشقان تىرنالار»، «رۋحىمنىڭ پاديشاسى»، «مۇقاعالي-جەلتوقسان»، «بايتەرەك»، «كوز جاسىم»، «بورىتوستاعان» جىر جيناقتارىنىڭ اۆتورى. 2008- جىلى «ەرلىككە ەسكەرتكىش» اتتى داستاندار جيناعى جارىق كورگەن. بالالارعا ارنالعان «بالاباقشاعا بارار جولدا»، «جەلكىلدەپ وسكەن قۇراقتاي»، «كۇمىس كۇيمە»، «قارتايمايدى كۇن نەگە؟» اتتى كىتاپتارى بار.
