«ارسەلورميتتال تەمىرتاۋدىڭ» مەملەكەتپەن جاساعان كەلىسىمشارت ءماتىنى جالپىعا جاريالانادى
قازاقستان اۋماعىندا قاتتى پايدالى قازبا كەنىشتەرىن يگەرۋشى ERG، «قازاق مىس»، «ارسەلورميتتال تەمىرتاۋ» سياقتى الپاۋىت كومپانيالاردىڭ مەملەكەتپەن جاساعان ينۆەستيتسيالىق كەلىسىمشارتتارى جالپىعا قولجەتىمدى ەتىپ جاريالانادى، دەپ حابارلايدى Kazinform.
بۇل تۋرالى ونەركاسىپ جانە قۇرىلىس ۆيتسە- ءمينيسترى يران شارحان ادىلەت مينيسترلىگىندە ءوتىپ جاتقان ۆەدومستۆوارالىق كوميسسيا وتىرىسى كەزىندە ايتتى.
«قازىر قوعامدا بۇرىنعى قاراعاندى مەتاللۋرگيا كومبيناتى ل. ميتتالدىڭ قولىنا قالاي وتكەنى تۋرالى داۋلى پىكىر كوپ. ساراپشىلار وسىنداي ينۆەستيتسيالىق كەلىسىمشارتتار جاريا تۇردە بەكىتىلۋى كەرەكتىگىن ايتىپ ءجۇر. زاڭناماعا وسى تۇرعىدا وزگەرىس ەنگىزەسىزدەر مە؟»، - دەپ سۇرادى جۋرناليست ۆيتسە- مينيستردەن.
«بىزدە قازىر حالىقارالىق باستاما بار. سول باستاماعا ءبىز دە قوسىلدىق. بۇكىل ليتسەنزيالاردىڭ، كەلىسىمشارتتاردىڭ شارتى ءبىزدىڭ مينيسترلىك سايتىندا جاريالانادى. كەز كەلگەن ادام ونىمەن تانىساتىن مۇمكىندىك بولادى. وسىعان دەيىن قول قويىلعان شارتتاردىڭ ءماتىنى دە جاريالانادى. ءسىز ايتىپ وتىرعان «ارسەلورميتتال تەمىرتاۋدىڭ» دا، كەز كەلگەن جەر قويناۋىن پايدالانۋشىلاردىڭ كەلىسىمشارتتارى جاريالانادى»، - دەدى ول.
مينيستر ورىنباسارىنىڭ سوزىنشە، زاڭناماداعى بۇل وزگەرىس كۇشىنە ەنگەنشە ءبىراز ۋاقىت كەرەك.
«ءبىز بۇل جۇمىستى باستاپ كەتتىك. ليتسەنزيالار سايتىمىزدا جاريالاندى دا. ال ينۆەستيتسيالىق كەلىسىمشارتتاردىڭ ماتىندەرىمەن جۇمىس ىستەپ جاتىرمىز. وسى جىلدىڭ اياعىنا دەيىن كەلىسىمشارتتاردىڭ جارتىسىن جاريالاپ بولامىز. كەلەسى جىلدىڭ ورتاسىنا دەيىن قالعانىنىڭ ءبارىن تىركەپ بولامىز. مەن مۇناي سالاسىن ايتپاي- اق قويايىن، تەك قانا قاتتى قازبالار بويىنشا ايتىپ تۇرمىن. «قازاقمىس، «ERG»، «ارسەلور» سياقتى كاسىپورىنداردىڭ كەلىسىمشارتتارىنىڭ ءماتىنى جاريالانادى»، - دەدى يران شارحان.
اۆتور
ەسىمجان ناقتىباي
