«ارقانىڭ ايبوزى» بايقاۋىنىڭ باس جۇلدەگەرى 3 ميلليون تەڭگەنىڭ سەرتيفيكاتىنا يە بولدى
اقمولا وبلىسىندا قاجىباي جاحين اتىنداعى «ارقانىڭ ايبوزى» Ⅱ رەسپۋبليكالىق ءداستۇرلى انشىلەر بايقاۋىنىڭ گالا كونتسەرتى ءوتىپ، جۇلدەگەرلەرى ماراپاتتالدى، دەپ حابارلايدى Kazinform.
ءان ونەرىنىڭ تىلسىمىنا بولەنىپ، كيەسى قونعان كوكشەنىڭ ايبوزى - قاجىباي بادىق ۇلى جاحين - ساۋلەلى، ماعىنالى، جارقىن ومىرىمەن، دارا شىعارماشىلىق ەڭبەگىمەن ءوزىنىڭ سوڭىنان ماڭگىلىك رۋحاني مۇرا - قازاق ونەرىنە ءان مەكتەبىن قالدىردى.
كيەلى قارا دومبىراسىمەن ەلىمىزدىڭ جانە الىس- جاقىن شەتەلدەردىڭ اسپانىندا قازاق اندەرىن اۋەلەتىپ، ۇلىلىعى مەن ومىرشەڭدىگىن دالەلدەگەن، حالىق اندەرىن، التى الاشىڭ ارداقتىلارى اباي، ءماشھۇر ءجۇسىپ، شاكارىم، ءبىرجان سال، اقان سەرى، ۇكىلى ىبىراي، بالۋان شولاق، ءمادي ءباپي ۇلى، ساكەن سەيفۋللين جانە باسقا دا ونەر مايتالماندارىنىڭ ءان جاۋھارلارىن ناقىشىنا كەلتىرە شىرقاپ، وزىندىك ونەر مەكتەبىن قالىپتاستىردى.
- قاجىباي جاحين اتىنداعى «ارقانىڭ ايبوزى» Ⅱ رەسپۋبليكالىق ءداستۇرلى انشىلەر بايقاۋى ءداستۇرلى انشىلەر اراسىندا ءان ونەرىن دارىپتەيتىن ماڭىزدى ءىس- شارالاردىڭ بىرىنە اينالدى. ويتكەنى دارىندى ءانشىنىڭ ەسىمى، ونىڭ اسەم داۋىسى، ورىنداۋ مانەرى مىڭداعان تىڭدارمان مەن قازاق ءان مادەنيەتىن سۇيەتىندەردىڭ ەسىندە جانە جۇرەگىندە قالدى، - دەدى قۇتتىقتاۋ سوزىندە اقمولا وبلىسى مادەنيەت باسقارماسىنىڭ باسشىسى ايگۇل باۋبەكوۆا.
وسىمەن ەكىنشى رەت ۇيىمداستىرىلىپ وتىرعان بايقاۋ بۇل جولى ەكى كەزەڭمەن جالعاستى. ءبىرىنشى كەزەڭدە اباي، شىعىس قازاقستان، الماتى، قاراعاندى، اقمولا وبلىستارى مەن استانا، الماتى قالالارىنان كەلگەن ون ءۇش قاتىسۋشى جارىس شارتتارى بويىنشا ق. جاقيننىڭ رەپەرتۋارىنان ءبىر ءان، ءان ونەرىنىڭ سەرىلەرى ءبىرجان سال، اقان سەرى، ۇكىلى ابىراي، بالۋان شولاق اندەرىنەن، حالىق اندەرىنەن جانە قازىرگى زامانعى كومپوزيتورلاردىڭ قورجىنىنان بارلىعى ءتورت انمەن ونەرلەرىن كورسەتتى. ال، ەكىنشى كەزەڭدە ونەرپازدار ءوز قالاۋلارى بويىنشا ەكى ءان ورىنداسا، قوسىمشا ءبىر ءاندى جەرەبە ارقىلى 22 اننەن تۇراتىن قاجىباي ءانشىنىڭ رەپەرتۋارىنان ورىندادى.
ەكى كۇنگە ۇلاسقان ءان بايقاۋىنا تورەلىك ەتىپ، باعاسىن بەرگەن قازىلار القاسىنىڭ قۇرامىنا قازاقستاننىڭ ەڭبەك سىڭىرگەن قايراتكەرى گۇلميرا سارينا، قازاقستاننىڭ ەڭبەك سىڭىرگەن قايراتكەرى ايزات قارابەكوۆا، قازاقستان جازۋشىلار وداعىنىڭ مۇشەسى قۋانىش وسپان، مادەنيەت قايراتكەرى مارا ەسمۇحانوۆا، ءانشى، ارقا اندەرىن زەرتتەۋشى سارسەنباي حاسەنوۆ، مادەنيەت سالاسىنىڭ ۇزدىگى ەلميرا تولەۋبايەۆا ەندى.
رەسپۋبليكالىق بايقاۋدىڭ قورىتىندىسى بويىنشا «جۇزدەن - جۇيرىك، مىڭنان- تۇلپار» شىققان انشىلەردەن باعى جانىپ ءۇشىنشى دارەجەلى ديپلوم، 300 مىڭ تەڭگە اقشالاي سەرتيفيكاتىمەن اباي وبلىسىنان كەلگەن باۋىرجان ماركسوۆ، ەكىنشى دارەجەلى ديپلوم، 700 مىڭ تەڭگە اقشالاي سەرتيفيكاتىمەن ۇلىتاۋلىق ءمولدىر سمايىل، ءۇشىنشى دارەجەلى ديپلوم، 1 ميللليون تەڭگە اقشالاي سەرتيفيكاتىمەن جەرلەسىمىز ەرقانات ەرۇلانبەك ماراپاتتالسا، ۇزدىك ونەر كورسەتكەنى ءۇشىن، باس جۇلدە - 3 ميلليون تەڭگە اقشالاي سەرتيفيكاتتى استانانىڭ ونەرپازى زامزاگۇل سماعۇل جەڭىپ الدى.
سونىمەن بىرگە، ءىس- شارا بارىسىندا مادەنيەت سالاسىنىڭ دامۋىنا قوسقان ۇلەسى ءۇشىن ءبىر توپ اقمولالىق قازاقستان رەسپۋبليكاسى مادەنيەت جانە اقپارات مينيسترلىگىنىڭ «مادەنيەت سالاسىنىڭ ۇزدىگى» توسبەلگىسىمەن ماراپاتتالدى.
ولاردىڭ قاتارىندا، ولكەتانۋشى، پۋبليتسيست، ق ر جۋرناليستتەر وداعىنىڭ مۇشەسى، مادەنيەت ارداگەرى گۇلبارشىن سالىق، اقمولا وبلىسى مادەنيەت باسقارماسىنىڭ مالىك عابدۋللين مۋزەيىنىڭ اعا عىلىمي قىزمەتكەرى ەلەنا لەونيدوۆنا، «وقجەتپەس» فولكلورلىق توبىنىڭ ءانشىسى، ماكينسك قالاسىنىڭ بالالار- جاسوسپىرىمدەر شىعارماشىلىق ورتالىعىنىڭ ديرەكتورى قازبەك قالييەۆ، اقكول اۋداندىق مادەنيەت جانە تىلدەردى دامىتۋ ءبولىمىنىڭ «ورتالىقتاندىرىلعان كىتاپحانالار جۇيەسىنىڭ كىتاپحاناشىسى ناتاليا ميحايلوۆنا، اقان سەرى اتىنداعى مادەنيەت كوللەدجىنىڭ وقىتۋشىسى گالينا رىباكوۆا، ادەبيەت جانە ونەر مۋزەيىنىڭ عىلىمي قىزمەتكەرى نۇربولات المەنوۆ، ادەبيەت جانە ونەر مۋزەيىنىڭ عىلىمي قىزمەتكەرى باقىتبەك بەكمۇرات ۇلى بار.
ايتا كەتسەك، بۇدان بۇرىن كوكشەتاۋدا «ازات رۋحتىڭ ابىلاي حانى» اتتى رەسپۋبليكالىق اقىندار ايتىسى وتكەنىن جازعان ەدىك.
اۆتور
اسحات رايقۇل
