ارگەنتينا پرەزيدەنتى حاۆەر ميلەي «الاياقتىق جاسادى» دەگەن كۇدىككە ءىلىندى

شاعىمداردا «ەل پرەزيدەنتى الاياقتىق جاسادى» دەلىنگەن، سونداي-اق ول لاۋازىمىنا سايكەس كەلمەيتىن قىزمەتپەن اينالىستى، ءسوز بايلاسۋ جانە باسقا دا قىلمىستار جاسادى دەپ ايىپتالعان.

ارگەنتينا پرەزيدەنتى حاۆەر ميلەيگە قارسى الەۋمەتتىك جەلىدە الاياقتىق كريپتوۆاليۋتالىق سحەمانى ناسيحاتتاعانى ءۇشىن 100-دەن استام سوت ءىسى قوزعالدى. ىستەردى قاراۋعا پروكۋرور ەدۋاردو تايانو مەن سۋديا ماريا سەرۆيني تاعايىندالعان.

14- اقپاندا ميلەي X سايتىندا كريپتوۆاليۋتا ارقىلى ارگەنتيناداعى شاعىن بيزنەسكە ينۆەستيتسيا تارتۋعا كومەكتەسەتىن جوبا تۋرالى اقپارات جاريالاعان. الەۋمەتتىك جەلىدە سىننىڭ استىندا قالعاننان كەيىن پرەزيدەنت جوبانىڭ ەگجەي-تەگجەيىنەن بەيحابار ەكەنىن ايتىپ، جازبانى ءوشىرىپ تاستاعان.

دەگەنمەن، پرەزيدەنت كەڭسەسىنىڭ 15- اقپاندا جاريالاعان مالىمدەمەسىندە ميلەي جوباعا قاتىسى بار ادامدارمەن كەم دەگەندە ەكى رەت كەزدەسىپ، اتالعان جوبانى تالقىلاعانى ايتىلعان.

پرەزيدەنتتىڭ العاشقى جاريالاعان جازباسىمەن ءبىر ۋاقىتتا ىسكە قوسىلعان جوبادا پايدالانىلعان كريپتوۆاليۋتانىڭ قۇنى 5 دوللارعا دەيىن كوتەرىلگەن بولاتىن، كەيىن ول قۇلدىراپ، قۇنى 1 دوللارعا دا جەتپەي قالدى.

كريپتوۆاليۋتا يەلەرى قىسقا ۋاقىت ىشىندە ميلليونداعان دوللار تابىسقا كەنەلگەن. پرەزيدەنت مالىمدەمەسىنەن كەيىن وپپوزيتسيا ونى ءتۇرلى قىلمىستار، ونىڭ ىشىندە نەمقۇرايلىلىق، اقشانى جىلىستاتۋ، مەملەكەتتىك قىزمەتشى لاۋازىمىنا سايكەس كەلمەيتىن ارەكەتتەرگە باردى دەپ ايىپتاي باستادى. «وتان ءۇشىن وداق» پارتياسىنىڭ ءبىر توپ دەپۋتاتى ميلەيگە يمپيچمەنت جاريالاۋدى ۇسىناتىندارىن ايتتى.

ايتا كەتەيىك، وتكەن جىلدىڭ قىركۇيەك ايىندا ۆەنەسۋەلا سوتى ارگەنتينا پرەزيدەنتىن قاماۋعا الۋعا وردەر بەردى.

اۆتور

جاراسقان نۇرىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى