ارمەنيا پارلامەنتى ەۋروپالىق وداققا كىرۋ پروتسەسىنىڭ باستالۋى تۋرالى زاڭ جوباسىن ماقۇلدادى

12-اقپان كۇنگى كەزەكتى سەسسيادا ارمەنيا ۇلتتىق جينالىسىنىڭ دەپۋتاتتارى كوپشىلىك داۋىسپەن «ارمەنيا رەسپۋبليكاسىنىڭ ەۋروپالىق وداققا قوسىلۋ پروتسەسىنىڭ باستالۋى تۋرالى» زاڭ جوباسىن ءبىرىنشى وقىلىمدا قابىلدادى. زاڭ جوباسىنا 63 دەپۋتات داۋىس بەرسە، 7 دەپۋتات قارسى بولدى.

- ارمەنيا رەسپۋبليكاسى ارمەنيا حالقىنىڭ ەركىن بىلدىرە وتىرىپ، ارمەنيا رەسپۋبليكاسىن قاۋىپسىز، قورعالاتىن، دامىعان جانە گۇلدەنگەن ەلگە اينالدىرۋ مىندەتىن العا قويا وتىرىپ، ارمەنيا رەسپۋبليكاسىنىڭ ەۋروپالىق وداققا قوسىلۋ پروتسەسىنىڭ باستالعانىن حابارلايدى، - دەلىنگەن زاڭ ماتىنىندە.

بىرەر كۇن بۇرىن ارمەنيا پارلامەنتى ازاماتتىق باستامامەن ۇسىنىلعان زاڭ جوباسىن تالقىلاۋدى باستاعان بولاتىن.

بۇعان دەيىن ارمەنيا ۇكىمەتى ە و- عا كىرۋ پروتسەسىن باستاۋ تۋرالى زاڭ جوباسىن ماقۇلدادى. ارمەنيا پرەمەر-ءمينيسترى نيكول پاشينيان ەلدىڭ ە و- عا كىرۋى تۋرالى تۇپكىلىكتى شەشىم رەفەرەندۋم ارقىلى قابىلدانۋى ءتيىس ەكەنىن اتاپ ءوتتى.

ارمەنيانىڭ ەكونوميكا ءمينيسترى گيەۆورگ پاپويان ارمەنيا ۇكىمەتىنىڭ زاڭ جوباسىن ماقۇلداۋى اياسىندا ارمەنيانىڭ ە ا ە و مۇشەلىگىنە قاتىستى ماسەلەگە تۇسىنىك بەردى.

2024 -جىلدىڭ 1-شىلدەسىندە ارمەنيانىڭ ءۇشىنشى دەموكراتيالىق فورۋمىندا ارمەنيا پرەمەر-ءمينيسترى نيكول پاشينيان ە و- عا كىرۋ بويىنشا ەلدە رەفەرەندۋم وتكىزۋدىڭ قاجەتى جوق ەكەنىن مالىمدەدى.

وسىعان دەيىن ارمەنيا مەن ا ق ش- تىڭ ستراتەگيالىق سەرىكتەستىك تۋرالى قۇجاتقا قول قويعانى تۋرالى حابارلاعان ەدىك.

اۆتور

ەركەجان سماعۇلوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى