ارحەولوگتار مىسىردا 4500 جىل بۇرىنعى قابىردەن قازىنا تاپتى
12-قاڭتاردا مىسىردىڭ مەمفيس قالاسىندا ورنالاسقان ساككارا قورىمىنان ەجەلگى داۋىرگە تيەسىلى قۇندى قازىنالار مەن ساركوفاگ تابىلدى، دەپ حابارلايدى Kazinform اگەنتتىگى Euronews-كە سىلتەمە جاساپ.
قابىر ءبىزدىڭ داۋىرىمىزگە دەيىنگى 2649-2150 -جىلدارعا ساي كەلەدى. ول جەردە تاريحتان سىر شەرتەتىن بەيىتتەر مەن جادىگەرلەر بار.
«بۇل ايماقتىڭ تاريحى تۋرالى باعا جەتپەس اقپارات بەرەدى»، - دەيدى جاپوندىق ساراپشى نوزومۋ كاۆاي.
مىسىردىڭ تۋريزم جانە كونە جادىگەرلەر مينيسترلىگىنىڭ حابارلاۋىنشا، ارحەولوگتار قابىردەن سيرەك قازىنالار، اشىق ءتۇستى بەتپەردە جانە ءبىزدىڭ زامانىمىزعا دەيىنگى 2890-2686 -جىلداردا ءومىر سۇرگەن كىشكەنتاي بالانىڭ قالدىقتارى تابىلعان.
سونىمەن قاتار ول جەردەن جەرلەۋ راسىمدەرىمەن بايلانىستى بولعان ەجەلگى ەگيپەت قۇدايى يسيس پەن ۇنسىزدىك پەن قۇپيا قۇدايى دەپ اتالعان گارپوكراتتىڭ تەرراكوتالىق ەكى ءمۇسىنى تابىلعان.
تابىلعان زاتتار اراسىندا ستەلا، گەرويد ەسىمدى ادامدارعا تيەسىلى ەكەنىن كورسەتەتىن جازۋى بار تاس تاقتا، ءتۇرلى تۇمارلار مەن قىش ىدىستار دا بار.
ايتا كەتەيىك، ساككارا - مىسىر استاناسى مەمفيستىڭ ۇلكەن قورىمى. بۇل يۋنەسكو- نىڭ الەمدىك مۇرا نىساندارىن جانە وننان استام پيراميدانى قامتيدى. ونىڭ ىشىندە ايگىلى گيزا پيراميدالارى، سونداي-اق ابۋ سير، داحشۋر جانە ابۋ رۋۆەيستەگى كىشىرەك پيراميدالار دا بار.
