پارانجا كيىپ، ساقال قويعاندارعا ايىپپۇل سالىنادى
قىرعىزستاندا قوعامدىق ورىنداردا ازاماتتاردىڭ جەكە باسىن انىقتاۋعا مۇمكىندىك بەرمەيتىندەي بەتىن جاۋىپ تۇراتىن كيىم كيىپ، كولەمدى ساقال قويعان ازاماتتارعا زاڭ بويىنشا ايىپپۇل سالۋ ۇسىنىلدى.
ءتيىستى زاڭ جوباسى قوعامدىق تالقىلاۋعا شىعارىلدى، دەپ حابارلايدى Kazinform اگەنتتىگىنىڭ ءتىلشىسى.
قۇجاتقا سايكەس، مۇنداي كيىمدى مەديتسينالىق سەبەپتەر بويىنشا كيۋگە رۇقسات ەتىلەدى. سونىمەن قاتار، بۇل تالاپتىڭ ۋاقىتشا ەڭبەك نەمەسە قىزمەتپەن اينالىساتىن جانە ديپلوماتيالىق مارتەبەسى بار شەتەلدىك ازاماتتارعا قاتىسى جوق.
بەتىن تولىعىمەن جاسىراتىن جانە ازاماتتاردى انىقتاۋعا مۇمكىندىك بەرمەيتىن كيىم كيگەنى ءۇشىن جەكە تۇلعالارعا 20 ەسەپتىك كورسەتكىش (2000 سوم) مولشەرىندە ايىپپۇل سالىنادى نەمەسە 30 ساعاتقا دەيىن قوعامدىق جۇمىستارعا تارتىلادى.
بۇزۋشىلىق قايتالانعان جاعدايدا 40 ەسەپتىك كورسەتكىش (4000 سوم) كولەمىندە ايىپپۇل سالىنادى نەمەسە 40 ساعاتقا دەيىن قوعامدىق جۇمىستارعا تارتىلادى.
قوعامدىق ورىنداردا ازاماتتى انىقتاۋعا مۇمكىندىك بەرمەيتىن ساقال قويعانى ءۇشىن 20 ەسەپتىك كورسەتكىش مولشەرىندە (2000 سوم) ايىپپۇل سالىنادى نەمەسە 30 ساعاتقا دەيىن قوعامدىق جۇمىستارعا تارتىلادى. ەگەر قايتالانعان جاعدايدا جەكە تۇلعالارعا ەڭ تومەنگى ايلىق جالاقىنىڭ 40 ەسەپتىك كورسەتكىش (4000 سوم) مولشەرىندە ايىپپۇل سالۋعا نەمەسە 40 ساعاتقا دەيىن قوعامدىق جۇمىستارعا تارتۋعا اكەپ سوعادى.
بۇعان دەيىن حابارلاعانىمىزداي، زاڭنامالىق دەڭگەيدە بەتتى جاۋىپ تۇراتىن پارانجا كيۋگە تىيىم سالۋدى ەنگىزۋدىڭ باستاماشىسى قىرعىز رەسپۋبليكاسى جوگوركۋ كەنەشىنىڭ دەپۋتاتى شاراپاتقان ماجيتوۆا بولدى. ول سوڭعى ۋاقىتتا ەلدە بەتىن تولىق جاۋىپ تۇراتىن پارانجا كيگەن ايەلدەر سانى ارتىپ كەلە جاتقانىن ايتتى.
