ارال قاسىرەتىنىڭ سالدارىن ورتالىق ازيا ەلدەرى عانا ەمەس، ودان تىسقارى جەرلەر دە سەزىنىپ وتىر - پرەزيدەنت
پرەزيدەنت قاسىم-جومارت توقايەۆ ب ۇ ۇ-نىڭ ورتالىق ازيا ەكونوميكالارىنا ارنالعان ارنايى باعدارلاماسىنا (س پ ە ك ا) قاتىسۋشى مەملەكەتتەر باسشىلارىنىڭ ءبىرىنشى سامميتىندە ەكولوگيا سالاسىنداعى ىنتىماقتاستىقتىڭ ءمانى زور ەكەنىنە توقتالدى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.
قازاقستان پرەزيدەنتى ەكولوگيا جانە كليمات پروبلەماتيكاسى، سونداي اق ترانسشەكارالىق سۋ رەسۋرستارىن باسقارۋ جونىندەگى بىرلەسكەن عىلىمي-زەرتتەۋ جانە قولدانبالى زەرتتەۋ جۇمىستارىن باستاۋ ماڭىزدى دەپ ەسەپتەيدى. ونىڭ ايتۋىنشا، بۇل ماسەلەنىڭ سپەكا ەلدەرىنىڭ بارىنە دە قاتىسى بار. بۇل رەتتە ءبىر عانا مەملەكەتتىڭ جالعىز ءوزى تابىسقا جەتۋى مۇمكىن ەمەس. ارال قاسىرەتى - سونىڭ ايقىن دالەلى. ونىڭ اۋىر سالدارىن ورتالىق ازيا ەلدەرى عانا ەمەس، ودان تىسقارى جەرلەر دە سەزىنىپ وتىر.
- كەلەسى جىلى قازاقستان حالىقارالىق ارالدى قۇتقارۋ قورىنىڭ ءتوراعاسى رەتىندە ءبىر كەزدەرى الەمدەگى ەڭ ءىرى تۇيىق سۋ ايدىندارىنىڭ ءبىرى بولعان ارال ماڭىنداعى قورشاعان ورتا دەگراداتسياسىنىڭ الدىن الۋ جۇمىستارىن كۇشەيتۋگە ەرەكشە ءمان بەرمەك. كاسپي تەڭىزىندەگى كۇردەلى ەكولوگيالىق احۋال دا الاڭداۋشىلىق تۋعىزادى. تەڭىزدىڭ تابانى تايىزدانىپ، وعان قۇياتىن وزەن سۋلارىنىڭ مولشەرى كۇرت ازايدى. بيورەسۋرستار قىسقارىپ، انتروپوگەندىك لاستانۋعا ۇشىراپ جاتىر. كاسپيدى قۇتقارۋ ۇزاقمەرزىمدى حالىقارالىق ىنتىماقتاستىقتىڭ باسىمدىعىنا اينالۋعا ءتيىس. بارلىق مۇددەلى تاراپتى وسىناۋ بىرەگەي سۋ ايدىنىنىڭ جاعدايىن جاقسارتۋ ءۇشىن ورتاق ءىس- قيمىل جوسپارىن ازىرلەۋگە شاقىرامىن. ءبىزدىڭ ءوزارا ءتيىمدى ىنتىماقتاستىعىمىز كاسپييدىڭ بەيبىتشىلىك جانە مۇمكىندىكتەر تەڭىزى رەتىندەگى مارتەبەسىن نىعايتا تۇسەتىنىنە سەنىمدىمىن،- دەدى پرەزيدەنت.
