پارا بەرۋگە يتەرمەلەگەن، الاياقتىق جاساعان - ەلوردادا ادۆوكات 11 جىلعا سوتتالدى
استانا. KAZINFORM - ەلوردادا ادۆوكات ءوز قورعاۋىنداعى ازاماتتاردىڭ مۇددەسىنە وكىلدىك ەتۋ بارىسىندا، پايدا تابۋ ماقساتىمەن بىرنەشە رەت الاياقتىق جاساپ، اسا ءىرى مولشەردە پارا بەرۋگە يتەرمەلەۋ ارقىلى جالپى 164,9 ميلليون تەڭگە قاراجاتىن يەمدەنگەن، دەپ حابارلايدى ق ر باس پروكۋراتۋراسىنىڭ باسپا ءسوز قىزمەتى.
سوتتالۋشى اۋدارىلعان قاراجاتتاردىڭ ءوز جۇمىسى ءۇشىن اقىسى رەتىندە العاندىعى تۋرالى القابيلەردى سەندىرۋگە تىرىسقان، الايدا مەملەكەتتىك ايىپتاۋشى ونىڭ وسى قىلمىستاردى جاساعاندىعىن دالەلدەدى.
القابيلەر سوتىنىڭ ۇكىمىنە سايكەس سوتتالۋشى بىرنەشە رەت الاياقتىق جاساعانى جانە اسا ءىرى مولشەردە پارا بەرۋگە يتەرمەلەگەنى ءۇشىن كىنالى دەپ تانىلىپ، مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرىلا وتىرىپ، 11 جىلعا باس بوستاندىعىنان ايىرىلدى.
پارا نىسانى زاڭسىز الىنعان مۇلىك رەتىندە تانىلىپ، مەملەكەت كىرىسىنە ءوندىرىلدى.
ۇكىم زاڭدى كۇشىنە ەندى.
اۆتور
ەربول جانات
