التاي اۋدانىندا كەنت تۇرعىندارى قاپتاعان ايۋلارعا الاڭداۋلى
«كوگىلدىر بۇعاز» دەمالىس ورنى جۇرتىنىڭ سوزىنشە، التاي اۋدانى اۋماعىندا سوڭعى جىلدارى مايماق قاپتادى. بىرەۋ-مىرەۋ جازىم بولماي تۇرعاندا، اكىمدىكتىڭ تەزىرەك شارا قولدانۋىن كۇتىپ وتىر.
اۋدان حالقى ەكى-ءۇش جىل بۇرىن سەرەبريانسك قالاسىندا بولعان جاعدايدى مىسال ەتتى. ايۋ باقشاعا دەيىن كەلىپ ءبارىن شاشىپ، كومىردى قوپارىپ كەتكەن. ونىڭ الدىندا 14 ومارتانى تالقانداپ، كۇندە كەشكىسىن ويران سالىپتى.
«بىرەۋلەر ءتۇز تاعىسىن «ازىق تاپشىلىعىنان ەلدىمەكەندەرگە جاقىنداپ ءجۇر» دەپ ايتتى. كادىمگى قوڭىر ايۋ. اقىرعاندا ءدال جانىمىزعا كەلىپ تۇرعانداي بولادى. كەيبىر ازاماتتاردا مىلتىق بار. ءبىراق اتساڭ ايىپپۇل ارقالاتىپ جىبەرەدى دەپ ەستىدىك. ساقتىق تانىتساق قاتەردەن امان قالارمىز، ءبىراق قوراداعى مالعا شاپسا نە بولماق؟ قىركۇيەكتىڭ اياعىنا قاراي اۋىل ىرگەسىنە دەيىن كەلدى»، - دەيدى جاڭا بۇقتىرما كەنتىنىڭ تۇرعىندارى.
انىقتالعانداي، «كوگىلدىر بۇعاز» دەمالىس ورنى توڭىرەگىن ءتىنتىپ، اۋىلداستاردى شوشىتقان قوڭىر ايۋ قونجىقتارىن ەرتىپ، «جورىققا» شىعىپ ءجۇر. جەرگىلىكتى اكىمدىككە ءوتىنىش تۇسكەن سوڭ جاعدايدى رەتتەۋدىڭ جولىن ىزدەي باستادى. ولارمەن تىزە قوسىپ، ورمان جانە اڭشىلىق شارۋاشىلىق ينسپەكتورلارى دا ءوز جوسپارىن ۇسىنعان.
«مۇنى ەستىگەن بويدا بىردەن وقيعا بولعان جەرگە باردىق. دەمالىس ورنى ماڭىن كەزگەن ايۋلار تۇرعىندارعا تەك شىعىن كەلتىرىپ قانا قويماي، ومىرلەرىنە دە قاتەر توندىرەدى. سولاي بولعاننىڭ وزىندە جانە ماتەريالدىق شىعىن كەلتىرىلسە، جەرگىلىكتى اتقارۋشى ورگانعا قاراستى مامانداندىرىلعان ۇيىمعا حات تۇرىندە جۇگىنۋگە بولادى. ولار اڭشىلىق مەرزىم ءالى باستالماسا دا، اتۋعا رۇقسات بەرەدى»، - دەدى جاڭا بۇقتىرما كەنتىنىڭ اكىمى مۇرات مۇحامەتجانوۆ.
شەنەۋنىكتەر اڭعا ءوز بەتىمەن قارۋ كەزەنۋگە تىيىم سالىناتىنىن، اتقان جاعدايدا قىلمىستىق جاۋاپكەرشىلىككە تارتۋ قاراستىرىلعانىن تاعى ءبىر ايتتى.
«جۋىقتا تۇرعىندارمەن كەزدەسۋ ۇيىمداستىرىلدى. ولارعا ايۋ مالعا شاۋىپ، تۇرعىندار ومىرىنە قاۋىپ توندىرسە قانداي ارەكەتكە بارۋ كەرەكتىگى جونىندە تۇسىندىرمە جۇمىستارىن جۇرگىزدىك»، - دەدى اكىمدىكتەگىلەر.
Massaget.kz
