اقتوبەدە تورعاي وزەنىنەن كەلگەن سۋدىڭ دەڭگەيى 1 مەتردەن استى
اقتوبە. KAZINFORM - اقتوبە وبلىسى ىرعىز اۋدانىنىڭ اۋىلدارىنا ءالى دە تورعاي وزەنىنەن سۋ كەلىپ جاتىر. بيىكتىگى 1 مەتردەن استى.
اقتوبە وبلىسىنىڭ ىرعىز اۋدانىندا ءالى دە سۋ تاسقىنى قاۋپى سەيىلگەن جوق. قازىرگى كەزدە نۇرا اۋىلىن تۇگەلگە دەرلىك سۋ السا، مامىر مەن بەلشەردە دە سۋ باسقان ۇيلەر بار. ال قۇيلىس، جايساڭبايدا اۋىل اينالاسىنداعى بوگەتتى بەكىتۋ جۇمىسى ءجۇرىپ جاتىر.
- قۇيلىس اۋىلى بويىنشا سۋ تاسقىنىنا قارسى بوگەۋ جۇمىستارى جۇرگىزىلۋدە. قازىرگى تاڭدا تورعاي وزەنىنەن كەلەتىن سۋ دەڭگەيى 1 مەتردەن استى. بارلىعى 8 تەحنيكا بار. ونىڭ ۇشەۋى كاماز، تورتەۋى تيەگىش جانە بىرەۋى ك700. 20982 اسكەري ءبولىمىنىڭ 55 اسكەري قىزمەتكەرى، ءورت ءسوندىرۋ جانە اپاتتىق-قۇتقارۋ جۇمىسى قىزمەتىنىڭ 5 ادامى سوندا. قۇيلىس اۋىلىندا اسكەريلەر سانى – 40، اۋىل تۇرعىندارىن قوسقاندا 80 ادامدى قۇرايدى. اسكەريلەردىڭ 20 ادامى جايساڭباي اۋىلىنا جىبەرىلدى. بوگەۋ جۇمىستارى جۇرگىزىلۋدە، - دەپ حابارلادى اقتوبە وبلىسى اكىمىنىڭ باسپا ءسوز قىزمەتى.
ەسكە سالساق ىرعىز اۋدانىندا 8-ءساۋىر كۇنى توتەنشە جاعداي جاريالاندى. مۇندا نۇرا اۋىلى جاڭا ورىننان سالىنادى.
