اقتوبەدە جاۋىن- شاشىن سالدارىنان ءبىر اۋدانداعى ەگىن ورۋ جۇمىسى توقتادى

اقتوبە وبلىسى بويىنشا بيىل 740 مىڭ گەكتاردان استام جەرگە اۋىل شارۋاشىلىعى داقىلدارى ەگىلدى. ونىڭ 440 مىڭ گەكتارعا جۋىعى - ءداندى داقىل. بۇگىندە 212 مىڭ گەكتاردان استام جەردەن ءداندى داقىل جينالدى. بۇل - جالپى ەگىن القابىنىڭ تەڭ جارتىسى. ءار گەكتارىنان ورتا ەسەپپەن 10,4 تسەنتنەر ءونىم جينالعان. قازىر قويماعا 220,4 مىڭ توننا استىق ءتۇستى. بۇل از. سەبەبى جاۋىن- شاشىن سالدارىنان كومبايندار توقتاپ تۇر، ال ەگىننىڭ ءبىر بولىگى قايتا كوكتەپ كەتكەن.

«جاۋىن- شاشىن كوپ، شارۋالارعا قيىن. اسىرەسە، ايتەكە بي اۋدانىندا جاعداي وتە كۇردەلى بولىپ تۇر. ماماندار بارىپ قارادى. 138,1 مىڭ گا ءداندى داقىلدار القابىنىڭ تەك %16,7 ى عانا جينالدى. اۋداندا 21-تامىزدان بەرى جاۋىن- شاشىن توقتاۋسىز جاۋىپ، ەگىن جيناۋ جۇمىستارى تولىعىمەن توقتادى. «قازگيدرومەت» ر م ك دەرەكتەرىنە سايكەس، ايتەكە بي اۋدانى بويىنشا جاۋىن- شاشىن ايلىق نورمادان تامىزدا 136,6 م م جانە قىركۇيەك ايىندا بۇگىنگى كۇنگە %263,1 ارتىق تۇسكەن. الداعى كۇندەرى تاعى دا جاۋىن- شاشىن بولادى دەگەن بولجام بار»، - دەدى اقتوبە وبلىستىق اۋىل شارۋاشىلىعى باسقارماسىنىڭ باسشىسى قۇسايىن سارسەمباي.

ءدال وسى ايتەكە بي اۋدانىندا سارعايعان ءدان قايتا كوكتەپ كەتكەن.

«مۇنداي استىق تەك مال ازىعى رەتىندە جارامدى. ونى وتكىزۋ ماسەلەسى اشىق كۇيىندە قالىپ وتىر. وبلىس باسشىسى اسحات شاحاروۆ استىق وسىرەتىن ديقانشىلاردىڭ قيىن جاعدايدان شىعۋى ءۇشىن كومەك كورسەتىپ، جان- جاقتى شارالار قابىلداۋ قاجەت ەكەنىن اتاپ ءوتتى»، - دەپ حابارلادى وبلىس اكىمىنىڭ باسپا ءسوز قىزمەتى.

ايتا كەتەيىك، اقتوبە وبلىسىندا ەگىن القابىنىڭ %75,7 ى ايتەكە بي، قارعالى، حرومتاۋ، مارتوك اۋداندارىندا ورنالاسقان. مۇنداعى ايتەكە بي اۋدانىنىڭ ۇلەسى - %22,2.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى