اقتوبە كاسىپكەرلەرى كيىك ۇشاسىن قابىلداۋعا دايىن ەمەس

ب ق و- دان اقتوبەگە 800-دەن استام كيىك ۇشاسى اكەلىنىپ، ءبىر كۇننەن سوڭ ءبارى كەرى قايتارىلعانى بەلگىلى.

اقتوبە وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ باس مامانى قۋانىش دەمەگەنوۆتىڭ ايتۋىنشا، كيىك ۇشاسى 8-قاراشا كۇنى كاماز جۇك كولىگىمەن جەتكىزىلگەن. كەلىسىم بويىنشا “دالا ەلى” ج ش س- ءى مەن “قاسىموۆ” ج ك قابىلداپ، وتكىزۋى ءتيىس ەدى.

- بۇل جەردە ەت كومبيناتى مەن جەكە تۇلعا اراسىندا كەلىسىم جاسالعان. ونىڭ قۇجاتتارى دايىن ەمەس. باسقا ەت كومبيناتىنا بارىپ، باعاسىمەن كەلىسە الماي، كەرى قاراي الىپ كەتتى. شىنىن ايتقاندا قابىلداۋعا كەلىسكەن ەت كومبيناتىنىڭ قۇرىلىسى بىتپەگەن. ۆەتەرينارلىق تالاپقا دايىن بولماي شىقتى. كەيىن "ايبەك" ءوندىرىستى كووپەراتيۆىنە اپارعان. كاسىپكەر ءبىر- بىرىمەن كەلىسە المادى، - دەدى اقتوبە وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ باس مامانى قۋانىش دەمەگەنوۆ.

ول كيىك ۇشاسى ءراسۋا بولمادى، جۇك كولىگىنىڭ سالقىنداتقىشى بار دەپ ايتتى. ال "باعاسىن كەلىسە المادى" دەگەن "ايبەك" اۋىل شارۋاشىلىعى وندىرىستىك كووپەراتيۆىنىڭ باسشىسى قۇجاتى دۇرىس بولماعانىن ايتتى.

- ءبىز كيىكتى قابىلدامادىق. ەشقانداي قۇجاتى دايىن ەمەس. تەرى، ۆەتەريناريا ينسپەكسياسى بىزگە قۇجات بەرۋى كەرەك. ءتىرى مالعا فورما-1 دەگەن انىقتاما بولادى. بۇل جەردە دە سونداي. سويۋ ءۇشىن قانداي دا ءبىر نەگىز بولۋى كەرەك. اتۋعا رۇقسات بەرىلگەنىمەن، ءالى ناقتى قۇجاتى جوق. ولار قانداي قۇجات كورسەتۋ كەرەك ەكەنىن دە بىلمەيمىن. ءبارى زاڭدى بولۋى ءۇشىن قانداي قۇجات كەرەك ەكەنىن ناقتىلاۋ كەرەك. ۇسىنىس ءتۇستى. بۇل مال سويۋ ورنى. تەك قىزمەت كورسەتەمىز. سويامىز، جۋىپ، تازارتىپ، قۇجاتىن بەرەمىز. ال ەتىن ساتپايمىز. الداعى ۋاقىتتا جۇمىس ىستەۋگە بولادى. ءتىپتى بۇقتىرىلعان ەت تە دايىنداۋعا مۇمكىندىك بار، - دەدى ايبەك قالدىعۇلوۆ.

ايتا كەتەيىك، كيىك ەتى ساتىلادى دەگەن مال سويۋ ورنىنا پوليتسيا دا بارعان. وبلىستىق پ د باسپا ءسوز قىزمەتىنىڭ حابارلاۋىنشا، بۇل قوعامدىق قاۋىپسىزدىكتى قامتاماسىز ەتۋ شاراسى.

اۆتور

التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى