اقتوبەگە ب ق و- دان جەتكىزىلگەن كيىكتىڭ 800 باس ۇشاسى كەرى قايتارىلدى
اقتوبە قالاسىنا باتىس قازاقستان وبلىسىنان جەتكىزىلگەن 800 باس كيىك ۇشاسى ەت كومبيناتىنا وتكىزۋ ءۇشىن جىبەرىلگەن. ءتۇرلى سەبەپكە بايلانىستى ءبارى ءبىر تۇندە كەرى قايتارىلدى، دەپ حابارلايدى Kazinform.
الەۋمەتتىك جەلىلەردە كيىك ەتىنىڭ كەلىسى 1500 تەڭگەدەن ساتىلاتىنى تۋرالى اقپارات تاراپ كەتتى. وندا كولىككە تيەلىپ جاتقان كيىك ۇشاسىن كورۋگە بولادى. ءتىپتى تەرىسى سىپىرىلماعان.
اقتوبە وبلىسى بويىنشا ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ باسشىسى ادىلكەرەي اۋەلبايەۆتىڭ ايتۋىنشا، باتىس قازاقستان وبلىسىندا اقبوكەندەردى اتۋعا رۇقسات بەرىلگەن. اقتوبە وبلىسى بۇل تىزىمدە جوق.
- ب ق و اتىلعان كيىكتەردى جاقىن وبلىستارعا، ونداعى ەت وڭدەيتىن كومبيناتتارعا جىبەرگەن. الايدا اقتوبەدەگى ەت كومبيناتتارى اقبوكەندەردىڭ ۇشاسىن وڭدەي المايتىندىقتان، جۇك كولىگى كەيىن قايتارىلدى. كيىكتىڭ ەتىن تەك ەت وڭدەۋ كومبيناتتارىنا تاپسىرۋعا بولادى، بازارلاردا ساتۋ زاڭمەن تىيىم سالىنعان. ال فوتو 1,5-اي بۇرىن تۇسىرىلگەن. الەۋمەتتىك جەلىدەگى جازباعا تاقىرىپقا ساي قولدانىلعان، - دەپ اقپارات تاراتتى اقتوبە وبلىسى اكىمىنىڭ باسپا ءسوز قىزمەتى.
ال اۋىل شارۋاشىلىعى مينيسترلىگى ۆەتەرينپاريالىق باقىلاۋ جانە قاداعالاۋ كوميتەتىنىڭ اقتوبە وبلىستىق اۋماقتىق ينسپەكسياسى باسشىسىنىڭ ورىنباسارى ۋبايدوللا اۋەلبايەۆتىڭ ايتۋىنشا، اقتوبە قالاسىنا كورشىلەس باتىس قازاقستان وبلىسىنان 800 باستاي كيىك اكەلىندى.
- ولاردى سويعىزۋ ءۇشىن كەلىسىمشارتقا وتىرعان مال سويۋ وبەكتىلەرىنىڭ ءبىرى ەسەپتىك ءنومىرىن الماعان، ياعني، ءالى ىسكە قوسىلماعان وبەكت. ەكىنشىسىنىڭ ۆەتەرينارلىق- سانيتارلىق ساراپتاما وتكىزۋگە ليتسەنزياسى جوق. ەتتى قايتا وڭدەيتىن كاسىپورىن اراسىندا باعا كەلىسىمى بولماعان سوڭ كيىكتەردىڭ ۇشاسىن باتىس قازاقستان وبلىسىنا الىپ كەتتى، - دەپ حابارلادى اقتوبە وبلىسى اكىمىنىڭ باسپا ءسوز قىزمەتى.
اۆتور
التىناي ساعىندىقوۆا
