اقتاۋلىقتار كاسپي تەڭىزى سۋىنىڭ قىزىل تۇسكە بويالۋىنا الاڭداۋلى
اقتاۋ. KAZINFORM - ەرەكشە قۇبىلىس 1-شاعىن اۋدانداعى تەڭىزدىڭ جاعالاۋىندا تىركەلدى. ادەتتەگىدەن وزگەشە جاعدايعا تۇرعىندار الاڭداۋشىلىق تانىتىپ، ەكولوگتارعا حابار بەرگەن.
الايدا ماڭعىستاۋ وبلىستىق ەكولوگيا دەپارتامەنتىنىڭ حابارلاۋىنشا، الاڭداۋعا نەگىز جوق، بۇل تابيعي قۇبىلىس.
- ماڭعىستاۋ وبلىستىق ەكولوگيا دەپارتامەنتىنىڭ ماماندارى جىل سايىن بولاتىن، كاسپي تەڭىزىنىڭ قىزىل تۇسكە بويالۋ قۇبىلىسىنا بايلانىستى بيىلعى 12-اقپان كۇنى تەڭىز سۋىنان سىناما الدى. ونىڭ اياسىندا تەڭىز سۋىنىڭ قۇرامىنا حيميالىق جانە مۇناي ونىمدەرىنىڭ بار نەمەسە جوق ەكەندىگىنە تالداۋ جۇمىستارى جۇرگىزىلەدى. ناتيجەسى قوسىمشا جاريالانادى، - دەلىنگەن حابارلامادا.
اقتاۋلىق ەكولوگ كيريلل وسيننىڭ ايتۋىنشا، بۇل قۇبىلىس جىلدا قىس مەزگىلىندە قايتالانادى. سەبەبى، وسى كەزدە بالدىرلار كوبەيىپ، گۇلدەيدى.
- اسىرەسە، قار جاۋسا قىزىل ءتۇس قورقىنىشتى بولىپ كورىنەدى. بۇل نەگىزى قوڭىر بالدىرلار، - دەيدى ەكولوگ.
ماماندار «دوستار»، «نۇر- پلازا» جاعاجايلارى مەن ياحتا كلۋبىنىڭ اۋماعىنان سىنامالار العان.
