اقتاۋدا ىزدەۋدە جۇرگەن، سوتتالعان ادام تابىلدى
ماڭعىستاۋ وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ قاۋىپسىزدىگى بارىنشا تومەن مەكەمەسىندە جازاسىن وتەۋشى، ىزدەۋدە جۇرگەن ب. ىزبەرگەنوۆ اقتاۋ قالاسىنان تابىلدى.
بۇل تۋرالى قىلمىستىق-اتقارۋ جۇيەسى دەپارتامەنتىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
«اقتاۋ قالاسىنىڭ اۋماعىنداعى جەكە كاسىپورىنداردىڭ بىرىندە جۇمىس ىستەپ جۇرگەن ول كولونياعا بەلگىلەنگەن ۋاقىتتا كەلمەي قالعان. دەپارتامەنت قىزمەتكەرلەرى جەدەل ىزدەستىرۋ شارالارى بارىسىندا سوتتالعان ادامدى تاۋىپ، كولونياعا قايتاردى»، - دەلىنگەن باسپا ءسوز مالىمەتىندە.
سوتتالعان ب. ە. ىزبەرگەنوۆ 1982-جىلى تۋعان. ونى 2018-جىلى قىركۇيەك ايىندا مۇنايلى اۋداندىق سوتى ق ر قىلمىستىق كودەكسىنىڭ 124-بابى ياعني «جاس بالالاردى ازعىندىق جولعا ءتۇسىرۋ» بويىنشا 7 جىلعا باس بوستاندىعىنان ايىرۋعا ۇكىم شىعارعان. 2023-جىلدىڭ ماۋسىم ايىنا دەيىن اتىراۋ وبلىسى بويىنشا قىلمىستىق-اتقارۋ جۇيەسى جالپى رەجيمدەگى كولونياسىندا جازاسىن وتەگەن.
سودان كەيىن اتىراۋ قالاسى سوتىنىڭ قاۋلىسىمەن ماڭعىستاۋ وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ قاۋىپسىزدىگى بارىنشا تومەن مەكەمەسىنە اۋىستىرىلعان.
ايتا كەتەيىك، قازاقستان رەسپۋبليكاسىنىڭ قىلمىستىق-اتقارۋ زاڭناماسىنا سايكەس قاۋىپسىزدىگى بارىنشا تومەن مەكەمەسىندە جازاسىن وتەۋشىلەر ەگەر قاجەت بولسا اكىمشىلىكتىڭ رۇقساتىمەن مەكەمەگە ىرگەلەس اۋماقتىڭ شەگىندە قاداعالاۋسىز جۇرۋگە قۇقىلى.
