اقتاۋدا كورشىسى سەپكەن ۋدان ەكى بالانىڭ كوز جۇمۋى: ايجان ەسماعامبەتوۆا پىكىر ءبىلدىردى

«قازىرگى كەزدە ەپيدەميولوگيالىق تەرگەپ تەكسەرۋ وتكىزىلىپ جاتىر. سونىڭ قورىتىندىسى بويىنشا پاتەر يەسى دەزينفەكسيا جۇمىستارىن ءوز بەتىمەن وتكىزىپ، دەزينفەكسيا قۇرالدارىن بازاردان ساتىپ الىپ، ۇيدە ونى قالدىرىپ، ءوز وتباسىن الىپ كەتكەن. ۋلى زات جەلدەتۋ جۇيەسىمەن كوتەرىلىپ، سول ۇيدە تۇرعان كورشىلەرىندە وسىنداي جاعداي تىركەلدى. قازىر قىلمىستىق تەرگەۋ باستالدى»، - دەدى باس سانيتار دارىگەر.

ونىڭ ايتۋىنشا، كەيىنگى 3-4 جىلدا زيانكەستىڭ ۋىنان ادامنىڭ قايتىس بولۋى بىرنەشە رەت تىركەلگەن. سوندىقتان زيانكەستەردى ۋلاۋمەن اينالىساتىن ۇيىمداردىڭ قىزمەتىن ليتسەنزيا ارقىلى رەتتەۋ تەتىگىن قايتا كۇشىنە ەنگىزۋ كوزدەلىپ وتىر.

«بيولوگيالىق قاۋىپسىزدىك زاڭىنىڭ اياسىندا كەلەسى جىلدان باستاپ بارلىق دەزينفەكسيا، دەراتيزاتسيا جۇمىستارى ليتسەنزيالاۋدان وتەدى. ياعني، سونداي جۇمىستاردى وتكىزۋ ءۇشىن ليتسەنزيا الۋ كەرەك بولادى. ءبىراق بۇل وتە كۇردەلى جاعداي. ءبىزدىڭ ازاماتتارعا بەرەتىن كەڭەسىم، ۋلاۋ قۇرالدارىن ساتىپ العان كەزدە مەملەكەتتىك تىركەۋ تۋرالى كۋالىگى مەن نۇسقاماسىن سۇراۋ كەرەك. نۇسقاماعا قاراپ قانا وسىنداي جۇمىستاردى وتكىزۋگە بولادى. ءبىراق دەزينفەكسيا، دەراتيزاتسيا جۇمىستارىن وتكىزەتىن مامانداردىڭ قىزمەتىنە جۇگىنگەن دۇرىس. ءوز بەتىمەن ۇيدە ونداي جۇمىستاردى وتكىزبەۋ كەرەك.

بۇعان دەيىن زيانكەستەردى ۋلاۋ جۇمىستارىمەن اينالىساتىن ۇيىمداردىڭ قىزمەتى ليتسەنزيامەن رەتتەلمەيتىن. 2007 -جىلعا دەيىن ونداي رەتتەۋ بولدى، كەيىن الىپ تاستالعان. كەيىنگى 3-4 جىلدا اقتاۋداعى سياقتى 3-4 جاعداي بولدى. سوندىقتان ءبىز «بيولوگيالىق قاۋىپسىزدىك تۋرالى» زاڭ اياسىندا وسىنداي ليتسەنزيالاۋدى كىرگىزەمىز»، - دەدى ايجان ەسماعابتەوۆا.

ەسكە سالساق، اقتاۋدا قاندالا ۋىنان كورشى پاتەردەگى 2021، 2022 -جىلى تۋعان بالالار كوز جۇمعان ەدى.

زيانكەستى ۋلاۋ شاراسىن تالاپقا ساي وتكىزبەگەن پاتەر يەسى 5 جىلدان 10 جىلعا دەيىن باس بوستاندىعىنان ايىرىلۋى مۇمكىن.

اۆتور

ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى