اقتاۋ تەڭىز ساۋدا پورتىنا حالىقارالىق مارتەبە بەرىلدى
پرەمەر-مينيستر ءاليحان سمايىلوۆ «اقتاۋ تەڭىز ساۋدا پورتىنا حالىقارالىق ماڭىزى بار تەڭىز پورتى مارتەبەسىن بەرۋ تۋرالى» ۇكىمەت قاۋلىسىنا قول قويدى، دەپ حابارلايدى قازاقپارات.
«اقتاۋ تەڭىز ساۋدا پورتىنا حالىقارالىق ماڭىزى بار تەڭىز پورتى مارتەبەسى بەرىلسىن. قازاقستان رەسپۋبليكاسى كولىك، ۇلتتىق ەكونوميكا، قارجى مينيسترلىكتەرى قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن وسى قاۋلىدان تۋىندايتىن قاجەتتى شارالاردى قابىلداسىن»، - دەلىنگەن پرەمەر-مينيستر قول قويعان قاۋلىدا.
قۇجات قول قويعان كۇننەن، ياعني 21- قىركۇيەكتەن باستاپ كۇشىنە ەندى.
بۇعان دەيىن حابارلعانىمىزداي، اتالعان باستاما ەلىمىزدىڭ كولىك-ترانزيت الەۋەتىن دامىتۋ ماقساتىندا قولعا الىندى.
«جوبا مەملەكەت باسشىسىنىڭ جاڭا گەوساياسي جاعدايلاردا قازاقستان رەسپۋبليكاسىنىڭ كولىك-ترانزيت الەۋەتىن دامىتۋ ماسەلەسى تۋرالى 2022-جىلعى 5- شىلدەدەگى كەڭەستىڭ قورىتىندىسى بويىنشا بەرگەن تاپسىرماسىنا سايكەس ازىرلەنگەن. وسى جوبانى ىسكە اسىرۋ رەسپۋبليكالىق بيۋجەتتەن قاراجات ءبولۋدى تالاپ ەتپەيدى»، - دەپ تۇسىندىرمە بەرىلگەن قاۋلىعا.
ەسكە سالايىق، 2018-جىلدىڭ قىركۇيەگىنە دەيىن اقتاۋ تەڭىز ساۋدا پورتى حالىقارالىق مارتەبەگە يە بولدى. كەيىن ۇكىمەت قاۋلىسىمەن ول الىنىپ تاستالدى.
