اقتاۋ دۋبايعا اينالا ما: باس جوسپارعا وزگەرىس ەنگىزىلدى

بۇل تۋرالى ماڭعىستاۋ وبلىسىنىڭ اكىمى نۇرداۋلەت قيلىباي ءمالىم ەتتى.

- جۋىردا ۇكىمەتتە ماڭعىستاۋ وبلىسىن دامىتۋعا ارنالعان جيىن ءوتتى. ول جيىندا 2027 -جىلعا دەيىن تۋريستىك كلاستەردى دامىتۋعا باعىتتالعان 167 ميلليارد تەڭگەنىڭ 14 ءىرى جوباسى ىسكە اسىرۋ جوسپارلاندى. بوزجىرا مەن ايراقتىدا ءار قايسىسى 150 ورىندىق قوناق ءۇي كەشەنى بوي كوتەرىپ، كاسپي جاعالاۋىندا 500 ادامعا دەيىن دەمالاتىن ساۋىقتىرۋ كەشەنى مەن بالالار ساۋىقتىرۋ لاگەرلەرىن سالۋ دا جوسپارلانعان. اقتاۋدى باكۋ مەن دۋباي قالالارىنىڭ ۇلگىسى بويىنشا دامىتۋ ءۇشىن باس جوسپارعا وزگەرىس ەنگىزىلدى. جوسپارعا ساي قالادا 10 مىڭ ورىندىق ستاديون، تەڭىز ۆوكزالى، «اۋەندى دومبىرا» ساۋلەت قۇرىلىسى مەن جاڭا جاعاجاي سىندى نىساندار بوي كوتەرەدى دەپ كۇتىلۋدە، - دەدى نۇرداۋلەت قيلىباي ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

سونداي- اق، اكىم «اقتاۋ» اۋەجايىنان ۇشاتىن ىشكى جانە حالىقارالىق اۋە رەيستەرىنىڭ (28 باعىتقا) ارتاتىنىن ايتتى.

- كەندىرلىدە جاڭا اۋەجاي سالىنادى. سونىمەن قاتار، «ماڭعىستاۋ» تەمىرجول ۆوكزالى قايتا جاڭعىرتىلىپ، ناتيجەسىندە تاۋلىگىنە 2,5 مىڭ جولاۋشىنى قابىلدايدى. الداعى 5  جىلدا ماڭعىستاۋدان قاتىنايتىن جولاۋشىلار پويىزدارىنىڭ 250 ۆاگونى جاڭارىپ، قۇرىق پورتىندا پارومدىق پاركى قۇرىلادى دەپ وتىرمىز، - دەيدى وبلىس باسشىسى.

ودان بولەك، نۇرداۋلەت قيلىباي اقتاۋ مەن جاڭاوزەن قالاسىندا وزىق ۇلگىدەگى جاڭا دراما تەاترلارى سالىناتىنىن جەتكىزدى.

- دارىندى بالالارعا ارنالعان سپورت مەكتەپ ينتەرناتىنىڭ قۇرىلىسىن جۇرگىزۋ دە دامۋ جوسپارىنا ەنگىزىلدى. سپورت مەكتەپ ينتەرناتى جوق بىردەن ءبىر ءوڭىر ەدىك. بۇل ورتالىق بولاشاق چەمپيونداردى دايىنداپ شىعادى دەپ سەنەمىز، - دەپ تولىقتىردى ءوڭىر اكىمى.

بۇعان دەيىن ماڭعىستاۋ وبلىسىنىڭ اكىمى اقتاۋلىقتاردىڭ اۋىزسۋعا جارىماي وتىرعانىنا قاتىستى تۇسىنىك بەردى.

ايتا كەتەيىك، جىل باسىنان بەرى اقتاۋ پورتىنان 6,8 ميلليون توننا جۇك تاسىمالدانىپ، ءوسىم %3,5 عا ارتتى.

سونىمەن قاتار ماڭعىستاۋ وبلىسىنىڭ اكىمى نۇرداۋلەت قيلىبايدان وڭىردەگى كادر ماسەلەسىنە قاتىستى پىكىرىن سۇراعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى