اقتاۋ اكىمىنىڭ بۇرىنعى ورىنباسارى وزبەكستاننان ۇستالدى

قارجىلىق مونيتورينگ اگەنتتىگى مالىمەتىنشە، تيمۋر ءسادۋاقاسوۆ مەملەكەتتىك شەكارانى زاڭسىز كەسىپ ءوتۋ كەزىندە وزبەكستان رەسپۋبليكاسىنىڭ شەكارا قىزمەتى تاراپىنان ۇستالعان. وعان وزبەكستان رەسپۋبليكاسىنا زاڭسىز كىرۋ دەرەگى بويىنشا قىلمىستىق ءىس قوزعالعان.

«ءسادۋاقاسوۆ تەرگەۋ يزولياتورىنا قامالعان. قازىر ونى وزبەكستان رەسپۋبليكاسىنان ەكستراديتسيالاۋ ماسەلەسى بويىنشا باس پروكۋراتۋرامەن بىرلەسىپ ءتيىستى ماتەريالدار دايىندالىپ جاتىر»، - دەپ جازىلعان حابارلامادا.

ايتا كەتەيىك، ءسادۋاقاسوۆقا الاياقتىق جانە اسا ءىرى كولەمدە پارا بەرۋگە يتەرمەلەۋ بويىنشا ايىپ تاعىلعان بولاتىن.

2023-جىلى شىلدەدە ءسادۋاقاسوۆ جانە «وبۋحوۆسكوە» كەن ورنىندا زاڭسىز پايدالى قازبالار ءوندىرۋ ىسىنە قاتىستى ادۆوكات قۇرمانبايەۆ لاۋازىمدى تۇلعالار اراسىنداعى بايلانىستارىن پايدالانا وتىرىپ، ۆ. ي. دولگاليەۆكە كاسىپتەگى سەرىكتەستەرىنە قارسى قىلمىستىق ءىس قوزعاۋدى ۇسىنعان.

الدىن الا كەلىسىم بويىنشا پارانىڭ ءبىرىنشى بولىگى رەتىندە 90 ميلليون تەڭگە العان ءسادۋاقاسوۆ پەن قۇرمانبايەۆ بۇل قاراجاتتى وزدەرى يەمدەنىپ، ۋادە ەتىلگەن مىندەتتەمەلەرىن ورىنداماعان.

قىلمىستىق ءىس پاۆلودار وبلىسىنىڭ مامانداندىرىلعان اۋدانارالىق قىلمىستىق ىستەر جونىندەگى سوتىنا قايتا قاراۋعا جولداندى.

ەسكە سالايىق، بۇعان دەيىن اقتاۋ اكىمىنىڭ بۇرىنعى ورىنباسارىنا ىزدەۋ جاريالانعانى حابارلاندى.

تيمۋر ءسادۋاقاسوۆ 2019-جىلى 18-اقپاندا اقتاۋ اكىمىنىڭ ورىنباسارى بولىپ تاعايىندالعان. بۇعان دەيىن ول ماڭعىستاۋ وبلىسىنىڭ كاسىپكەرلىك جانە ساۋدا باسقارماسى باسشىسىنىڭ ورىنباسارى قىزمەتىن دە اتقارعان.

ءسادۋاقاسوۆ «ادىلەت» جوعارى قۇقىق مەكتەبىندە زاڭگەرلىك ءبىلىم العان، سونداي-اق، كوكشەتاۋ ەكونوميكا جانە مەنەدجمەنت ينستيتۋتىندا وقىعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى