اقتاۋ اۋەجايى تەگەراننان كەلگەن ەكىنشى چارتەرلىك رەيستى قابىلدادى

بىلتىر العاش رەت «تەگەران - اقتاۋ - Rixos Water World Aktau» باعىتى ىسكە قوسىلعان بولاتىن. تەگەراننان اقتاۋعا چارتەرلىك رەيستەردىڭ ەكىنشى لەگى - تۋريستىك باعىتتار سالاسىنداعى تابىستى جۇمىستىڭ جالعاسى بولىپ وتىر.

يراندا ناۋرىز مەيرامى 20-ناۋرىزدان باستالادى. بۇل ءبىزدىڭ ەلىمىزدەگى ناۋرىز مەرەكەسىمەن سايكەس كەلەدى. پارسى ەلىندە ۇلىستىڭ ۇلى كۇنى مەرەكەسىندە ۇلتتىق سالت-داستۇرلەر كەڭىنەن كورسەتىلەتىن مادەني ءىس-شارالاردى ۇيىمداستىرۋىمەن وتەدى.

«بىلتىر ءبىزدىڭ وڭىرگە تەگەران-اقتاۋ باعىتى بويىنشا كوكتەمگى مەرەكەنى تويلاۋعا بورتتا 197 جولاۋشىمەن 2 چارتەرلىك رەيس ۇشتى. قوناقتار ناۋرىز مەرەكەسىندە قازاق مادەنيەتى مەن داستۇرلەرىمەن تانىستى. بيىل چارتەرلىك رەيستەر سانى 3 ەسەگە ارتتى. ال جولاۋشىلاردىڭ جالپى سانى 870 ادامعا دەيىن جەتەدى دەپ كۇتىلىپ وتىر. بۇل تۋريستەردىڭ قازاق مادەنيەتىنە دەگەن قىزىعۋشىلىعىنىڭ ارتۋىن جانە ەلدەر اراسىنداعى تۋريزم سالاسىنداعى ىنتىماقتاستىقتىڭ نىعايعانىن دالەلدەيدى»، - دەدى «Rixos Water World Aktau» قوناق ءۇيىنىڭ وكىلدەرى.

وسى ورايدا اقتاۋ اكىمدىگىنىڭ باسپا ءسوز قىزمەتى وسى باعىت بويىنشا جازعى ماۋسىمدا چارتەرلىك رەيستەردى جالعاستىرۋ جوسپارلانىپ وتىرعانىن مالىمدەدى. بۇل وڭىردەگى تۋريستىك سالانىڭ دامۋىنا ءوز سەپتىگىن تيگىزبەك. سونىمەن قاتار، ماڭعىستاۋ وبلىسىنىڭ ورتالىق ازياداعى تۋريستىك باعىت رەتىندەگى تارتىمدىلىعىن ايقىندايتىن بولادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى