اقمولالىق مۇعالىم رەسپۋبليكالىق بايقاۋدا جۇلدەلى 2- ورىنعا يە بولدى
قازاقستان رەسپۋبليكاسى عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ ۇيىمداستىرۋىمەن وتكەن «ەڭ ساۋاتتى جارناما - ءتىل ابىرويى» اتتى رەسپۋبليكالىق بايقاۋدا اقمولا وبلىسىنىڭ نامىسىن قورعاعان كوكشەتاۋ قالاسىنىڭ 1№ مەكتەپ-گيمنازياسى قازاق ءتىلى مەن ادەبيەتى ءپانىنىڭ مۇعالىمى ءبىرجان قايىر جۇلدەلى Ⅱ ورىندى يەلەندى، دەپ حابارلايدى Kazinform اقمولا وبلىسىنىڭ ىشكى ساياسات باسقارماسىنا سىلتەمە جاساپ.
اتالعان بايقاۋدىڭ ماقساتى - قازاقستان حالقىن توپتاستىرۋدىڭ اسا ماڭىزدى فاكتورى رەتىندە مەملەكەتتىك ءتىلدىڭ كەڭ اۋقىمدى قولدانىسىن قامتاماسىز ەتۋ، وسى باعىتتاعى جۇمىستاردى ۇيلەستىرۋگە «قازاقستان رەسپۋبليكاسىنداعى ءتىل تۋرالى» زاڭ تالاپتارىنىڭ ورىندالۋىن قاداعالاۋعا اتسالىسىپ جۇرگەن ازاماتتارعا قولداۋ كورسەتۋ، ولاردى ىنتالاندىرۋ.
«مەملەكەتتىك ءتىل - بارشا قازاقستاندىقتاردى توپتاستىراتىن ماڭىزدى فاكتور. سوندىقتان ەلىمىزدىڭ ءاربىر ازاماتى قازاق ءتىلىن مەڭگەرىپ، بارلىق سالادا دەرەكتەمەلەر مەن كورنەكى اقپاراتتاردى رەسىمدەۋدە زاڭناما تالاپتارى ساقتالۋعا ءتيىس»، - دەيدى بايقاۋ جەڭىمپازى.
رەسپۋبليكالىق بايقاۋعا ەلىمىزدىڭ 14 وڭىرىنەن شاعىن، ورتا بيزنەس سالاسىنىڭ وكىلدەرى جانە جەكە ازاماتتار قاتىسىپ، بايقاۋ شارتىنا ساي ايماقتارداعى كورنەكى اقپاراتتاعى قاتەلەردى، بۇزۋشىلىقتاردى انىقتاپ، ونى تۇزەتۋگە باعىتتالعان ءوز جۇمىستارىن ۇسىندى.
كوكشەتاۋلىق ءبىرجان بولات ۇلى 100 گە جۋىق ەڭبەگىن ۇسىنىپ، جۇلدەلى ورىننان كورىندى.
ءبىرجان قايىر - مەملەكەتتىك تىلدەگى جارناما ءماتىنىن ساۋاتتى رەسىمدەۋ جولدارىن ناسيحاتتاپ جۇرگەن ءتىل جاناشىرى.
ايتا كەتەيىك، جۇلدەلى ورىنعا يە بولعان جەڭىمپازدارعا ۇيىمداستىرۋ كوميتەتىنىڭ ارنايى ديپلومدارى مەن اقشالاي سىيلىقتارى تاپسىرىلدى.
