اقمولا وبلىسىندا ءبىر جىلدا 1630 ادام قانداس مارتەبەسىن العان

اقمولا وبلىسى جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ مالىمەتىنشە، تاۋەلسىزدىك العاننان بەرى اقمولا وبلىسىنا 30 مىڭنان استام قانداس قونىس اۋدارعان.

بىلتىرعى جىلى 1591 ادام، 645 وتباسى كەلگەن. ونىڭ باسىم كوپشىلىگى - موڭعوليا، تۇرىكمەنستان، رەسەي، وزبەكستان، قىتايدان اتاجۇرتقا قونىس اۋدارعاندار.

«وبلىسىمىزعا كەلگەن قانداستار سەلينوگراد، استراحان، شورتاندى اۋداندارى مەن كوكشەتاۋ، قوسشى، ستەپنوگور قالالارىندا تۇرىپ جاتىر. ولار جالپى پەرسونال جانە قۇرىلىس سالاسىندا جۇمىس ىستەيدى. جۇمىس بەرۋشى شىعىستارىنىڭ ءبىر بولىگى تۇرعىن ءۇي قۇنىنىڭ 50 پايىز مولشەرىندە وتەلەدى، ءبىراق قونىس اۋدارۋشىنىڭ نەمەسە قانداستىڭ وتباسىنا تۇرعىن ءۇي بەرۋ ءۇشىن 1160 ايلىق ەسەپتىك كورسەتكىش مولشەرىنەن اسپايدى. كوشۋگە ارنالعان شىعىستاردى وتەۋ ءبىر مەزگىلدە وتاعاسىنا جانە ءاربىر مۇشەسىنە 70 ايلىق ەسەپتىك كورسەتكىش مولشەرىندە جۇزەگە اسىرىلادى. تۇرعىن ءۇيدى جالداۋ جانە كوممۋنالدىق قىزمەتتەردى تولەۋ ءۇي ساتىپ العانعا دەيىن اي سايىن، ءبىراق ون ەكى ايدان اسپايتىن مەرزىمدە ۇسىنىلادى»، - دەدى ۆەدومستۆودان.

بۇگىنگى كۇنى ولاردىڭ ءبىرازى جەرگىلىكتى مەملەكەت كومەگىنىڭ ارقاسىندا جەكە كاسىبىن دوڭگەلەتىپ وتىر.

جاستاردىڭ اراسىندا قازاقستاندا ءبىلىم الىپ، جۇمىس ىستەپ جاتقاندار بار.

سونىڭ ءبىرى - موڭعوليانىڭ قازاقتار قونىستانعان بايان- ولگەي ايماعىنان كەلگەن قانداسىمىز مۇحامەد تىلەۋباي.

«مەن تاريحي وتانىما 2018 -جىلى كەلدىم. باستاپقىدا ارينە، قيىندىقتار بولدى، جۇمىس، وقۋ دەگەن سياقتى. وسىندا اعام تۇرعاندىقتان باسپانا جاعىنان قيىندىق بولمادى. العاشىندا استانادا قۇرىلىستا جۇمىس ىستەدىم. كەيىن ارادا ءبىر جىل وتكەن سوڭ وسكەمەندەگى سارسەن امانجولوۆ اتىنداعى شىعىس قازاقستان ۋنيۆەرسيتەتىنە گرانتقا وقۋعا ءتۇستىم. 2023 -جىلدان باستاپ كوكشەتاۋدا جەرگىلىكتى گازەتتە جۋرناليست رەتىندە جۇمىس ىستەپ كەلەمىن. جالپى، ايتارىم قازاقستاندا قانداستارعا مەملەكەت تاراپىنان بارلىق جاعداي جاسالعان، ازاماتتىق الۋدا كەدەرگى جوق. تەك مارتەبە الۋ قيىن، ول ءۇشىن شالعاي اۋىلدارعا بارۋ كەرەك، كوپتەگەن قانداستار قالا ماڭىندا قالعىسى كەلەدى. سول جاعىنان العاندا قيىندىق بار»، - دەيدى مۇحامەد تىلەۋباي.

ايتۋىنشا، قازاقستان مەن موڭعوليانى سالىستىرعاندا تاريحي وتانىمىزدا جۇمىس ىستەيتىن جاستارعا مۇمكىندىك كوپ.

بوس جۇمىس ورىندارى دا جەتكىلىكتى، ءتۇرلى مەملەكەتتىك باعدارلامالار قاراستىرىلعان.

وسى رەتتە «جۇمىسپەن قامتۋ» ءتارىزدى مەملەكەتتىك باعدارلامار اقمولالىقتاردى ەڭبەككە تارتىپ، ءوز ءىسىن باستاۋعا نەمەسە قايتا دايارلىق كۋرسىنان ءوتىپ، ءتۇرلى كاسىپورىندار مەن مەكەمەلەردە سۇرانىسقا يە ماماندىقتار بويىنشا جۇمىسقا ورنالاسۋعا ەداۋىر سەپتىگىن تيگىزۋدە.

ايتا كەتسەك، بۇدان بۇرىن بۇركىتشى ايشولپاننىڭ وتباسى قازاقستانعا كوشىپ كەلگەنىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى