اقشامدى الا الماي ءجۇرمىن: قىتايلىق وتباسىعا سۋرروگات انا بولعان قازاقستاندىق كەلىنشەك وقيعاسىن ءبولىستى

فوتو: time.kz

الماتى وبلىسىنىڭ تۇرعىنى اناستاسيا پوكولنيشكو Tiktok جەلىسىندە سۋرروگات انا بولىپ، اقشا تابۋ تۋرالى جارناما كورگەن.

«وتكەن جىلدىڭ باسىندا TikTok-تا ايەلدەرگە سۋرروگات انا بولۋدى ۇسىناتىن جازباعا كوزىم ءتۇستى. كوپ ادامدار سۋرروگات انالىقتىڭ نە ەكەنىن تۇسىنبەيدى. مەن دە سول كەزدە تۇسىنبەگەن ەدىم. ايەل باسقا ادامدار ءۇشىن بالا تۋىپ بەرگەندە، ءوزىنىڭ بيولوگيالىق بالاسىن بەرەدى دەپ ويلايتىنمىن. ءبىراق ولاي ەمەس ەكەن. كلينيكادا سۋرروگات اناعا سول بالانى دۇنيەگە اكەلەتىن وتباسىنىڭ ەمبريونى سالىنادى. سەن باسقا ادامداردىڭ اتا- انا بولۋىنا كومەكتەسەسىڭ جانە ولاردىڭ بالاسىن كوتەرىپ جۇرەسىڭ»، - دەيدى اناستاسيا.

ايەل سۋرروگات انا بولۋ تۋرالى شەشىمدى كۇيەۋىمەن اقىلداسا وتىرىپ قابىلداعانىن اتاپ ءوتتى.

«سۋرروگات انالىق كوپتەگەن ەلدەردە بار - بۇل زاڭدى، ءبىراق ءار جەردە ءوز تالاپتارى بار. قازاقستاندا سۋرروگات انا بولۋىعا 35 جاسقا دەيىن عانا رۇقسات ەتىلەدى. مەن بۇل تالاپقا ساي كەلمەدىم. قازىر 40 جاستامىن. ول جارنامانى كورگەن كەزدە 39 جاستا ەدىم. مەن الدىمەن كۇيەۋىممەن اقىلداستىم. ءبىز بىرگە ويلانىپ، وسى شەشىمدى قابىلدادىق، سودان كەيىن عانا اتا-انامىزعا ءبارىن ايتتىق. سوندىقتان دا مەن بۇل تۋرالى اشىق ايتىپ وتىرمىن»، - دەيدى ايەل.

اناستاسيا بۇل قادامعا وتباسىن قارجىلىق قيىندىقتار مەن نەسيەلەردەن قۇتىلۋ ءۇشىن بارعانىن ايتادى.

«مەن مۇنى وتباسىم ءۇشىن جاسادىم. سول ۋاقىتتا بىزدە قارىزدار جينالىپ قالعان ەدى. ءبىز ولاردان شىعۋعا تىرىستىق. كۇيەۋىم ءۇزىلىسسىز جۇمىس ىستەدى، مەن كلينينگتىك كومپانيا اشتىم، ءبىراق جۇمىس جۇرمەدى. ءتورت بالامىز بار: ۇلكەن قىزىم 19 جاستا، كىشى بالالارىم التى جانە ءۇش جاستا. ورتاڭعى ۇلىمىزعا 16 جاستا، ول ەرەكشە بالانىڭ ءبىرى، دتسپ دياگنوزىمەن دۇنيەگە كەلدى جانە ءبىز ونى اياققا تۇرعىزۋ ءۇشىن كۇرەسىپ كەلەمىز»، - دەيدى ايەل.

وسىلايشا ايەل الدىنا شىققان جارماناعا حابارلاسىپ، سۋرروگات انا اتانۋ ءۇشىن گرۋزياعا اتتانعان.

«مەن جارنامانىڭ اۆتورىنا جەكە حابارلاما جازدىم. ماعان وزبەكستاننان ناعيما ەسىمدى قىز جاۋاپ بەردى. ول اگەنتتىكتىڭ يەسى ەكەنىن، بۇل اگەنتتىك ايەلدەردى گرۋزياعا جىبەرىپ، سۋرروگات انا بولۋعا كومەكتەسەتىنىن ايتتى. سۋرروگات انالىق باعدارلامالارى بويىنشا قىزمەت كورسەتەتىن كومپانيا تبيليسيدە ورنالاسقان ەكەن. مەن سول جاققا بارۋعا كەلىستىم. ناعيما ماعان ءساراپتامالارتىزىمىن جىبەردى: ۆ ي چ، گەپاتيتتەر، سيفيليس، ت. ب. ولاردى قازاقستاندا تاپسىردىم. دەنساۋلىعىم جاقسى ەكەنى بەلگىلى بولعاندا، ماعان ۇشاق بيلەتتەرى جىبەرىلدى. بارلىعى وتە جىلدام ءوربىدى: اقپان ايىنىڭ باسىندا مەن جازبانى كوردىم، ال 2-ناۋرىزدا گرۋزياعا ۇشىپ كەتتىم»، - دەيدى سۋرروگات انا.

اناستاسيا سۋرروگات انالىق قىزمەتى ءۇشىن 15 مىڭ دوللار الاتىن بولىپ كەلىسكەن.

«9-ناۋرىزدا ماعان ەمبريوندى وتىرعىزدى. وعان دەيىن مەن كەلىسىمشارتقا قول قويدىم. بارلىعى وتە تەز ءجۇردى. ماعان الدىمەن كەلىسىمشارتتى ونلاين جىبەردى، سودان كەيىن بىردەن نوتاريۋسقا اپاردى. مەن تولىقتاي شارتتاردى ءتۇسىنىپ، تالقىلاپ ۇلگەرمەدىم. كەلىسىمشارتتان مەن قىتاي ازاماتتارى ءۇشىن بالا تۋاتىنىمدى ءبىلدىم. اقشانى تەك ولار بالاعا تۋۋ تۋرالى كۋالىك پەن شەتەلدىك پاسپورت راسىمدەگەننەن كەيىن الامىن. كومپانيا ماعان بۇل پروتسەسكە بار-جوعى 10 كۇن كەتەتىنىن ايتتى. ارينە، مەن بىردەن بالادان نوتاريۋس ارقىلى باس تارتۋىم قاجەت بولدى. بالانىڭ اتا-اناسىن مۇلدە كورمەدىم. تەك كومپانيانىڭ وكىلدەرىمەن عانا سويلەستىم. ماعان الدىن الا تولەم رەتىندە 400 دوللار تولەندى. كەلىسىمشارتتىڭ شارتتارىنا سايكەس، جۇكتىلىكتىڭ 20-اپتاسىندا كيىم ساتىپ الۋ ءۇشىن قوسىمشا 300 دوللار الدىم. تۋعاننان كەيىن ماعان 15000 دوللار تولەنەدى دەپ ۋادە ەتىلدى»، - دەيدى ايەل.

اناستاسيا ءدال ءوزى سياقتى سۋرروگات انا اتانۋ ءۇشىن گرۋزياعا بارعان قازاقستان، وزبەكستان، قىرعىزستان سياقتى ەلدەردەن جۇزدەگەن ايەلدىڭ بار ەكەنىن ايتادى.

«كوپشىلىگى جاقىندارىنان تبيليسيگە نە ءۇشىن ۇشىپ بارا جاتقانىن جاسىرادى. بارلىق توعىز اي جۇكتىلىك ۋاقىتىندا ايەلدەر تبيليسيدە تۇرىپ، گونورارلارىن العان سوڭ عانا ۇيلەرىنە قايتادى»، - دەيدى ايەل.

اناستاسيا قۇرساعىنداعى بالانى وتكەن جىلدىڭ قاراشا ايىندا بوسانسا دا، اقشاسىن الا الماي جۇرگەنىن ايتادى.

«2024 -جىلدىڭ 13-قاراشاسىندا مەن دەنى ساۋ ۇل بوساندىم. العاشىندا كومپانياداعىلار مەن بالا تۋىپ بەرگەن اتا-انا قۇجاتتارىن راسىمدەپ جاتقانىن ايتتى، پروتسەسس ۇزاققا سوزىلدى دەپ ءتۇسىندىردى. ءبىراق ماسەلە شەشىلگەندە دە مەن اقشامدى الا المادىم. تبيليسيدە كۇتۋىمدى جالعاستىردىم. 7-جەلتوقساندا انام قايتىس بولدى. مەن جەرلەۋگە ۇشىپ باردىم. گرۋزياعا قايتا ورالۋعا اقشام بولمادى. سول كەزدەن بەرى، مىنە، ەكى ايعا جۋىق ۋاقىت ءوتتى، كومپانيانىڭ وكىلدەرىمەن حابارلاسىپ تۇرامىن، ولار كۇن سايىن: «قازىر، ەرتەڭ»، - دەپ ۋادە بەرەدى»، - دەيدى ايەل.

ايەل جاعدايدى بايانداپ جەلىدەگى پاراقشاسىندا ۆيدەو جاريالاعاننان كەيىن كومپانيا وكىلدەرى اقشانىڭ ءبىر بولىگىن اۋدارىپ جىبەرگەن.

«29-قاڭتاردا مەنىڭ شوتىما 5000 دوللار ءتۇستى. مەن بىرنەشە كىشىگىرىم اۆانس العان بولاتىنمىن، ولاردى ەسەپتەگەندە مەن تاعى 8600 دوللار الۋىم كەرەك. مەنىڭ جاعدايىمدا تەك مەن عانا ەمەس، تبيليسيدە قازىر تۇرعان باسقا ايەلدەر دە بار. ولار وزدەرىنىڭ قارىزدارىن تولەۋدى تالاپ ەتۋدە.

سۋرروگات انا بولۋدى ويلاپ جۇرگەن ايەلدەرگە مەن ايتارىم، كەلىسىمشارتقا قول قوياتىن كومپانيالاردى تەرەڭ زەرتتەگەنىڭىز. ولاردىڭ اراسىندا بولعان ادامداردى تاۋىپ، ولارعا جازىپ، پىكىرلەردى وقىپ، تەك سودان كەيىن عانا قادام جاساڭىز. بارلىق ارتىقشىلىقتارى مەن كەمشىلىكتەرىن جاقسىلاپ ولشەپ العان ءجون. كەيدە «ماسەلەلەرىمدى باسقا جولدارمەن شەشكەندە جاقسى بولار ما ەدى؟» دەپ تە ويلايمىن»، - دەيدى ايەل. 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى