اقشاعا دەگەن كوزقاراسى ۇقساس جۇپتار باقىتتى وتباسى بولا الادى - زەرتتەۋ
ەرلى-زايىپتى اقشانى ءبىرىنشى ورىنعا قويعاندا، ولاردىڭ ءبىر-بىرىنە، نەكەگە دەگەن ريزاشىلىعى تومەندەيدى. مۇنى Journal of Social and Personal Relationships جۋرنالىندا جاريالانعان جاڭا زەرتتەۋ ناتيجەسى كورسەتىپ وتىر.
زەرتتەۋدە انىقتالعانداي، اقشاعا شامادان تىس ءمان بەرەتىن جۇپتار قارجى تۋرالى ءبىر-بىرىمەن اشىق سويلەسە المايدى، بۇل ءوز كەزەگىندە ولاردىڭ قارىم-قاتىناس ساپاسىنا كەرى اسەر ەتەدى. ال، كەرىسىنشە، اقشاعا دەگەن كوزقاراستارى ۇقساس جۇپتار ءوزارا ءتيىمدى قارجىلىق كوممۋنيكاتسيا ورناتىپ، نەكەدە دە وزدەرىن باقىتتىراق سەزىنەدى.
بايقاعانىمىز - جۇبايلاردىڭ ەكەۋى دە اقشانى ءبىرىنشى ورىنعا قويسا، ولار قارجى ماسەلەلەرىن سويلەسۋدەن قاشقاقتايدى. مۇنداي ماتەرياليستىك كوزقاراس شىنايى قارىم-قاتىناس ورناتۋعا كەدەرگى كەلتىرەدى، - دەيدى زەرتتەۋشى لەبارون-بلەك.
زەرتتەۋگە ا ق ش-تاعى 1153 جۇپ قاتىسقان. ولاردىڭ نەكەگە تۇرعانىنا ورتا ەسەپپەن 8 جىل بولعان. قاتىسۋشىلار ارنايى ساۋالنامانى تولتىرعان: وندا ولاردىڭ اقشانى قالاي قابىلدايتىنى، جۇبايىمەن قالاي سويلەسەتىنى جانە قارىم-قاتىناسىنا قانشالىقتى ريزا ەكەنى سۇرالعان.
ناتيجە:
اقشا تۋرالى كوزقاراسى ءبىر-بىرىنە ۇقساس جۇپتار قارجى تاقىرىبىندا اشىق سويلەسە الادى.
اقشاعا شەكتەن تىس ءمان بەرەتىن جۇپتاردا قارىم-قاتىناس پەن قاناعاتتانۋ دەڭگەيى تومەن.
«اقشاعا تابىنۋ» - باقىتقا جەتۋ جولى ەمەس، كەرىسىنشە، كۇيزەلىستىڭ كوزى.
زەرتتەۋشىلەردىڭ ايتۋىنشا، اقشا - ماڭىزدى قۇرال، ءبىراق وعان ءومىردىڭ باستى قۇندىلىعى رەتىندە قاراۋ - وتباسى باقىتىنا زيانىن تيگىزۋى مۇمكىن. جۇبايلار قارجىنى دۇرىس دەڭگەيدە ۇستاۋعا جانە ءبىر-ءبىرىنىڭ قۇندىلىقتارىنا قۇرمەتپەن قاراۋعا ءتيىس.
