اقشا قوزعالىسىنىڭ بارلىق تىزبەگىن كورەمىز - انتيكور باسشىسى «بويالعان» تەڭگەنىڭ العاشقى ناتيجەسى جايلى
استانا. KAZINFORM - سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعالي Jibek Joly تەلەارناسىنىڭ «ۋادە» باعدارلاماسىنا بەرگەن ەكسكليۋزيۆتى سۇحباتىندا ەلىمىزدەگى سيفرلىق «بويالعان» اقشا جوباسىنىڭ العاشقى ناتيجەسى جايلى ايتىپ بەردى.
«بويالعان» اقشا دەگەنىمىز نە؟
بۇل — تاڭبالاناتىن جانە بيۋجەتتەن بولىنگەننەن باستاپ سوڭعى الۋعا دەيىنگى ونىڭ پايدالانۋ بارلىق جولى قاداعالاۋدا بولاتىن سيفرلىق تەڭگە. قاراجاتتى تەك بەلگىلى ءبىر ناقتى ماقساتقا عانا پايدالانۋعا بولادى. ال ءاربىر ترانزاكتسيا انىق. تاۋارلار نەمەسە قىزمەتتەردىڭ ساتىپ الىنعانى راستالعان كەزدە سيفرلىق تەڭگە كادىمگە اقشاعا اينالدىرىلىپ، تولەم جۇزەگە اسىرىلادى.
— پرەزيدەنت تاپسىرماسىمەن قۇرالدى ەنگىزۋدى باستاعان كەزدە وعان ۇلتتىق بانكتى تارتتىق. ويتكەنى، ونىڭ پلاتفورماسىندا جۇزەگە اسىرىلادى جانە ول سيفرلىق تەڭگەنىڭ اۆتورى سانالادى. قارجى مينيسترلىگىن دە مىندەتتى تۇردە جۇمىلدىردىق. سەبەبى، ولار بيۋجەت اقشاسىنىڭ قوزعالىسىنا جاۋاپ بەرەدى. اتالعان بيۋجەت قاراجاتىن جاراتاتىن وكىلەتتى ورگاندار دا بار، - دەدى سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى.
ءىس جۇزىندە ول قالاي جۇمىس ىستەيدى؟
جۇيە «دوستىق-مويىنتى» تەمىر جولى قۇرىلىسى اياسىندا العاشقى سىناقتان ءوتتى. سيفرلىق پلاتفورما ارقىلى 164 ميلليارد تەڭگە اۋدارىلدى.
— وتكەن جىلى ىلكى جوبانى ىسكە قوستىق. بۇل — «دوستىق-مويىنتى» تەمىر جولىنىڭ قۇرىلىسى. ول جاقتا قازىردىڭ وزىندە شامامەن 160 ميلليارد تەڭگە سيفرلىق پلاتفورما ارقىلى، سيفرلىق «بويالعان» تەڭگە ارقىلى ءتۇستى. ءبىز اتالعان قاراجات قوزعالىسىنىڭ بارلىق تىزبەگىن كورەمىز، - دەپ اتاپ ءوتتى اسحات جۇماعالي.
جۇيە ىلكى رەجيمدە اتىراۋ وبلىسىنداعى «مۇقىر-قۇلسارى» اۆتوموبيل جوندەۋ بارىسىندا دا قولدانىلىپ جاتىر. وندا 100 ميلليون تەڭگە ماتەريالداردى ساتىپ الۋ كەزىندە كادەگە جاراتىلعان.
جۇيەنىڭ قانداي باسىمدىعى بار؟
اسحات جۇماعاليدىڭ ايتۋىنشا، تسيفرلىق «بويالعان» تەڭگە بيۋجەت قاراجاتىن ۇرلاۋ سىزباسىن كۇردەلەندىرەدى. بۇرىنىراق اقشانى جالعان مامىلەلەر ارقىلى ەنگىزىپ، قولما-قول اقشاعا اينالدىرىپ الۋعا بولاتىن. ال ەندىگى ۋاقىتتا مۇنداي ايلا مۇمكىن ەمەس. سەبەبى ءاربىر ترانزاكتسيا تىركەلىپ، ساراپتاما جاسالادى.
الداعى جىلى جول سالاسى بيۋجەتىن قالىپتاستىرۋدان باستاپ، ونىڭ ورىندالۋىن باقىلاۋعا دەيىنگى بارلىق كەزەڭى تولىعىمەن سيفرلىق قۇرالعا كوشىرىلمەك. كەلەشەكتە دەرەكتەر بازاسى مەن باعالاردى جانە جۇمىس كولەمىن اۆتوماتتى سارالاۋدى ىقپالداستىرۋدىڭ ارقاسىندا پروتسەسس مۇنان دا اشىق بولا ءتۇسىپ، جەمقورلىقتان قورعالادى.
بۇل جۇيەنى ەنگىزۋ — قازاقستاندا بيۋدجەت قاراجاتىن ءتيىمدى جانە ءادىل پايدالانۋدى ارتتىرۋعا باعىتتالعان ماڭىزدى قادامداردىڭ ءبىرى.
بۇعان دەيىن پرەزيدەنت قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا قۇرىلىس سالاسىنا اقشاعا سيفرلىق تەڭگە ارقىلى ەن سالۋ جوباسىن ەنگىزۋدى تاپسىرعانىن جازعان ەدىك.
