اقبوز اتتى قازاقتىڭ ەرلىگى ءتامام جۇرتتى تاڭ قالدىردى
استانا. KAZINFORM - قىتايدىڭ حىبەي پروۆينتسياسىنىڭ سيانتاو قالاسىندا تۇراتىن ىلەباي دوسىمبەك ۇلىنىڭ اقكوز ەرلىگى الەۋمەتتىك جەلى قولدانۋشىلارىنىڭ القاۋىنا بولەنىپ، العىسىنا يە بولدى.
الەۋمەتتىك جەلىنى شارلاپ كەتكەن بەينەجازبادان بەلگىلى بولعانداي، 4-اقپان كۇنى ءتۇس الەتىندە، تۇرعىنداردىڭ ءبىرى قالانى قاق جارىپ وتەتىن حانتسزيان وزەنىنە بايقاۋسىزدا قۇلاپ كەتەدى، ىزىنشە ونىڭ قىزى دا اكەسىن قۇتقارماق بولىپ وزەنگە سەكىرەدى.
جاقىن ماڭدا جۇرگەن 39 جاستاعى ىلەباي ايقاي- شۋدى ەستىگەن بويدا اقبوز اتىنا مىنە سالا اعىزعان بەتى وزەنگە قويىپ كەتىپ، سۋعا قۇلاعان ەر ادامدى امان- ەسەن جاعاعا شىعارادى.
ال ىلەبايدىڭ دوسى، قالا تۇرعىنى سۋ شاوگاو بويجەتكەن قىزدى سۋدان امان الىپ شىعادى.
دەر كەزىندە قۇتقارىلىپ، ۋاقتىلى جاردەم كورسەتىلگەندىكتەن ەر ادامنىڭ جاعدايى جەدەل تۇراقتانادى. وقيعا ورنىنان ونى تۋىسقاندارى الىپ كەتەدى.
جەرگىلىكتى Jimu News اقپاراتتىق اگەنتتىگىنىڭ جازۋىنشا، ىلەباي سول كۇنى دوسىمەن بىرگە وزەن بويىنداعى الاڭقايعا بايلۋن ەسىمدى بايگە اتىن باپتاۋعا بارعان. ەر ادامنىڭ سۋعا كەتكەنىن الدىمەن ىلەبايدىڭ دوسى سۋ شاوگاو بايقاپ قالىپ، اتتان سالادى، ىلەباي اقبوز اتپەن حانتسزيان سۋىنا تۇرا ۇمتىلادى. سۋ سۇيەكتەن وتەردەي سۋىق بولاتىن. ول ەر ادامنىڭ قاسىنا جەتكەنشە، سۋ اتتىڭ ساۋىرىنا دەيىن كوتەرىلىپ ۇلگەرەدى. ءبىر ءتاۋىرى وزەن اعىسى باياۋ بولعاندىقتان، ول سۋعا كەتكەن ەر ادامنىڭ قولىن بىردەن قارماپ، جاعاعا سۇيرەپ شىعارادى.
- جىلقى ەستى جانۋار عوي. مەن اتىما سەندىم. جاعاعا جەتكەندە سۋدان تايسالىپ، ءسال ىركىلىپ قالدى. قاراسام، سۋداعى ادامنىڭ توبەسى عانا قىلتيادى. ويلانىپ تۇرماستان تەبىنىپ قالدىم، اقبوز ات وزەنگە ءبىر- اق قارعىدى، - دەيدى ىلەباي.
قىتايلىق ب ا ق- تاردىڭ جازۋىنشا، ىلەباي دوسىمبەك ۇلى قىتايدىڭ ىلە قازاق اۆتونوميالىق وبلىسىنىڭ تۋماسى. 6 جاسىنان باستاپ بايگەگە شاپقان ونىڭ ءومىرى ات ۇستىندە ءوتىپ كەلەدى. ءول قازىر سيانتاو قالاسىنىڭ ىرگەسىندەگى شارۋا قوجالىقتارىنىڭ بىرىندە باقتاشىلىقپەن اينالىسىپ ءجۇر.
جەتى جاسار بايلۋن - ىلەباي باپتاعان بايگە اتتارىنىڭ ىشىندەگى سايىنعا شاپقان سايكۇلىگى.
- الايدا، وقيعا كەزىندە قاتتى سۋىق تيگەندىكتەن، تەمپەراتۋراسى 40°C- قا دەيىن كوتەرىلىپ، قازىرگى ۋاقىتتا ۆەتەرينارلىق باقىلاۋدا ەم قابىلداپ جاتىر، - دەپ جازادى قىتايلىق باسىلىمدار.
ىلەبايدىڭ ەرلىگى اقپارات قۇرالدارىندا ناسيحاتتالىپ، باتىل ارەكەتى مەن كاسىبي شەبەرلىگى الەۋمەتتىك جەلىدە كەڭىنەن تالقىلانىپ، قوعام مۇشەلەرىنەن ماقتاۋ الدى.
جەلى قولدانۋشىلارى ونى «ناعىز رىتسار»، «اقبوز اتتى قاھارمان» دەپ دارىپتەدى.
ال سيانتاو قالاسىنىڭ بيلىگى ىلەبايدى جەرگىلىكتى دەڭگەيدەگى «ەرەن ەرلىگى ءۇشىن» ماراپاتىنا ۇسىنىپ، وعان 10 مىڭ يۋان (شامامەن 700 مىڭ تەڭگە) اقشالاي سىيلىق تابىستادى.
ەرلان مازان
