اقپاراتقا قول جەتكىزۋ قۇقىعىن زاڭسىز شەكتەگەنى ءۇشىن مەملەكەتتىك ورگانداردىڭ جاۋاپكەرشىلىگى كۇشەيتىلمەك
استانا. KAZINFORM - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپاراتقا قول جەتكىزۋ جانە قوعامدىق قاتىسۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ ءبىرىنشى وقىلىمدا ماقۇلداندى.
«زاڭ جوباسى اياسىندا 3 كودەكسكە جانە 2 زاڭعا وزگەرىس ەنگىزۋ كوزدەلگەن. جوبانى ازىرلەۋگە حالىقارالىق جانە وتاندىق ساراپتاما ۇيىمدارى بەلسەنە قاتىستى. زاڭ جوباسىنىڭ نەگىزگى ماقساتى - ازاماتتاردىڭ اقپاراتقا قولجەتىمدىلىگىن بارىنشا كەڭىنەن قامتاماسىز ەتۋ، مەملەكەتتىك ورگانداردىڭ اشىقتىعى مەن بەلسەندىلىگىن ارتتىرۋ، جاۋاپكەرشىلىكتى كۇشەيتۋ. ازاماتتاردىڭ اقپاراتىنا كەڭىنەن قول جەتكىزۋى - ول سىبايلاس جەمقورلىققا قارسى كۇرەس پەن بيۋجەت قاراجاتىنىڭ جۇمسالۋىنا باقىلاۋ تۇرعىسىندا وتە وزەكتى. زاڭ جوباسىندا مەملەكەتتىك سەكتوردا اقپاراتقا قول جەتكىزۋ تۋرالى زاڭدى ءجيى جانە جۇيەلى بۇزۋعا جول بەرمەۋ، مەملەكەتتىك ورگاندارى رەسمي اقپاراتتى پرواكتيۆتى تۇردە جاريا ەتۋدى قامتاماسىز ەتۋ، مۇگەدەكتىگى بار ادامداردىڭ اقپاراتقا قولجەتىمدىلىگىن ارتتىرۋ قاراستىرىلعان»، - دەدى زاڭ جوباسىن تانىستىرعان مادەنيەت جانە اقپارات ءمينيسترىنىڭ مىندەتىن اتقارۋشى دانيار قادىروۆ.
زاڭ جوباسىندا:
- اقپاراتقا قول جەتكىزۋ قۇقىعىن زاڭسىز شەكتەگەنى ءۇشىن مەملەكەتتىك ورگانداردىڭ جاۋاپكەرشىلىگىن كۇشەيتۋ؛
- اقپاراتقا قول جەتكىزۋ سالاسىندا مەملەكەتتىك باقىلاۋدى ەنگىزۋ؛
- اقپاراتتىڭ اشىقتىعى پرەزۋمپتسياسى مەن اقپاراتتى پرواكتيۆتى تۇردە تاراتۋ قاعيداتتارىن بەكىتۋ؛
- مۇگەدەكتىگى بار ادامدارعا اقپاراتقا قول جەتكىزۋ ءۇشىن قاجەتتى جاعدايلار جاساۋ جانە تاعى باسقا باعىتتالعان نورمالار ۇسىنىلعان.
بۇعان قوسا، زاڭ جوباسىندا دەپۋتاتتاردىڭ زاڭ جوبالاۋ قىزمەتىنىڭ ءتارتىبىن وزگەرتۋ جونىندەگى نورمالار كوزدەلدى. ولار جۇمىس توبىنىڭ وتىرىسىندا تالقىلاۋ بارىسىندا الىپ تاستالدى.
