اق ءۇي: پۋتينمەن ترامپ ەمەس، ۋيتكوفف سويلەستى
استانا. KAZINFORM – ا ق ش پرەزيدەنتى دونالد ترامپ بۇگىن ۆلاديمير پۋتينمەن «ناتيجەلى جانە جاقسى» كەلىسسوزدەر تۋرالى ايتقاندا، ءوزىن ەمەس، ارنايى وكىلى ستيۆ ۋيتكوففتى مەڭزەگەنىن اق ءۇي ناقتىلادى، دەپ حابارلايدى BBC.
ترامپ بۇرىن TruthSocial الەۋمەتتىك جەلىسىندەگى جازباسىندا «ءبىز وتە جاقسى جانە ءونىمدى كەلىسسوزدەر جۇرگىزدىك» جانە «مەن پرەزيدەنت پۋتيننەن سۇرادىم» دەپ جازعاندىقتان، كەيبىر ب ا ق ترامپ پەن پۋتيننىڭ جەكە اڭگىمەسى بولعانىن حابارلادى.
بۇعان دەيىن ترامپ پۋتيننىڭ اسكەري قيمىلداردى توقتاتۋ تۋرالى ايتقان سوزدەرىنە قاتىستى پىكىر بىلدىرگەنى تۋرالى اقپارات تاراعان ەدى.
ايتا كەتەيىك، 13-ناۋرىزدا پۋتين ترامپتىڭ ارنايى وكىلى ستيۆ ۋيتكوففتى قابىلدادى. بۇل تۋرالى رەسەي پرەزيدەنتىنىڭ باسپا ءسوز حاتشىسى دميتري پەسكوۆ مالىمدەدى.
سونداي-اق، پەسكوۆ رەسەي مەن ا ق ش پرەزيدەنتتەرى ۆلاديمير پۋتين مەن دونالد ترامپتىڭ اڭگىمەلەسۋ ۋاقىتى ءالى بەلگىلەنبەگەنىن، الايدا ماسكەۋدە العان بارلىق اقپاراتتى ۋيتكوفف ا ق ش باسشىسىنا جەتكىزگەننەن كەيىن انىقتالاتىنىن اتاپ ءوتتى.
