اننالەنا بەربوك: ب ۇ ۇ- عا رەفورما كەرەك

بەربوك قازىرگى وتىرىس سوعىس، گۋمانيتارلىق اپاتتار، كليماتتىڭ وزگەرۋى جانە تەحنولوگيالىق سىن-قاتەرلەر سياقتى كوپقىرلى داعدارىستار اياسىندا ءوتىپ جاتقانىن اتاپ ءوتىپ، بۇل ماسەلەلەردى تەك حالىقارالىق قاۋىمداستىق بىرلەسە وتىرىپ قانا شەشە الادى دەدى.

ول الەمنىڭ تۇكپىر-تۇكپىرىندە ميلليونداعان ادامدار كۇن سايىن باستان كەشىپ جاتقان تراگەديالاردى ەسكە سالدى: مىسالى، ۇشقىشسىز اپپاراتتاردان تىعىلۋعا ءماجبۇر ۋكراينالىق قارت ايەلدەر، مەكتەپكە بارۋعا قورقاتىن گايتيلىك بالالار، نەمەسە كونگو دەموكراتيالىق رەسپۋبليكاسىندا قىزدارىن قارۋلى توپتاردان جاسىرىپ جۇرگەن ايەلدەر.

- نە ىستەۋگە بولمايدى - بۇل وسى داعدارىستاردى پايدالانىپ، ب ۇ ۇ ەسكىردى نەمەسە ماڭىزى جوق دەپ ايتۋعا جول بەرۋ. ب ۇ ۇ جارعىسى مىقتى جانە ول مەملەكەتتەر ونى ۇستانۋعا قانشالىقتى دايىن بولسا - سونشالىقتى بەرىك، - دەدى بەربوك.

ب ۇ ۇ رەفورماسى- زامان تالابى

بەربوك سوزىندە ب ۇ ۇ- نىڭ قۇرىلۋىنا سەبەپ بولعان تاريحي ءساتتى - ەكىنشى دۇنيەجۇزىلىك سوعىستان كەيىنگى قيراعان الەمدى ەسكە سالدى. ول كەزدە قول قويىلعان ب ۇ ۇ جارعىسى تۇتاس ءبىر ۇرپاق ءۇشىن باعىت-باعدار بولاتىن «جۇلدىز» ءرولىن اتقارعان.

- ب ۇ ۇ- نىڭ تاريحى - جەڭىستەر تاريحى ەمەس، بۇل - قايتا-قايتا ارەكەت جاساپ، تاباندىلىقپەن جۇمىس ىستەگەندەردىڭ تاريحى، - دەدى ول.

بەربوك ەلدەرگە ناعىز كوشباسشىلىق - ءوز ەركىن زورلىقپەن تاڭۋ ەمەس، وزگەلەرگە شابىت بەرىپ، قولداۋ كورسەتۋ قابىلەتى ەكەنىن ەسكە سالدى.

- باسقالارعا كومەكتەسۋ - تۇپتەپ كەلگەندە، ءوز ەلىڭدى دە كۇشەيتەدى، - دەدى ول، COVID-19 پاندەمياسىنا قارسى كۇرەستەگى د د س ۇ رولىنە جانە كليماتتىق داعدارىسقا قارسى بىرلەسكەن ءىس-قيمىلدىڭ ماڭىزدىلىعىنا توقتالا وتىرىپ.

ونىڭ ايتۋىنشا، ب ۇ ۇ بۇگىنگى تاڭدا شەشۋشى جولايرىقتا تۇر.

- ديالوگ پەن ديپلوماتيا «ءۇيىنىڭ» ءوزى دە جوندەۋدى قاجەت ەتەدى. سوندىقتان «ب ۇ ۇ-80» باستاماسى مەن رەفورمالار پروتسەسى - ارتىقشىلىق ەمەس، قاجەتتىلىك، - دەدى بەربوك.

رەفورما جۇيەنىڭ يكەمدىلىگى مەن تيىمدىلىگىن ارتتىرۋعا، سونداي-اق تۇراقتى دامۋ ماقساتتارىنا قول جەتكىزۋ ۇدەرىسىن جەدەلدەتۋگە باعىتتالۋى ءتيىس.

گەندەرلىك تەڭدىك ماسەلەسى

اننالەنا بەربوك ب ۇ ۇ- داعى ايەلدەردىڭ كوشباسشىلىقتاعى ورنىنا ەرەكشە نازار اۋداردى. ول ۇيىمنىڭ 80 جىل ىشىندە ەشقاشان ايەل ادامدى باس حاتشى ەتىپ سايلاماعانىن سىنعا الدى.

- ءتورت ميلليارد ايەل ءومىر سۇرەتىن الەمدە بىردە-ءبىر لايىقتى ۇمىتكەر تابىلماعانى ما، - دەپ، وزگەرىس قاجەتتىگىن باسا ايتتى.

بولاشاق - بىرلىككە بايلانىستى

ءسوز سوڭىندا بەربوك ب ۇ ۇ بولاشاعى - مەملەكەتتەردىڭ بىرىگىپ ارەكەت ەتۋ قابىلەتىنە بايلانىستى ەكەنىن اتاپ ءوتتى:

- ءبىز الەم حالقىنىڭ الدىندا ب ۇ ۇ بۇگىن دە بار ەكەنىن، ەرتەڭ دە، الداعى 80 جىلدا دا ومىرشەڭ بولاتىنىن دالەلدەي الامىز با؟ سەبەبى تۇپتەپ كەلگەندە، بۇل ۇيىم - بارلىق ەلدەر ءۇشىن ومىرلىك ماڭىزى بار قۇرال.

ايتا كەتەيىك، ب ۇ ۇ باس اسسامبلەياسى جيىنىندا ءسوز العان دونالد ترامپ ب ۇ ۇ- نى سىنعا الدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى