انگليا مەكتەپتەرىندە ۇيالى تەلەفوندى پايدالانۋعا تىيىم سالىندى

ءبىلىم ءمينيسترىنىڭ پىكىرىنشە، وقۋشىلار ەندى ساباق كەزىندە گادجەتتەرگە الاڭدامايدى جانە ءتارتىبى مەن مىنەز- قۇلقى جاقسارادى. بۇل تۋرالى Kazinform-نىڭ وسى ەلدەگى مەنشىكتى ءتىلشىسى عالىمجان قارامان ۇلى حابارلادى.

ءبىلىم مينيسترلىگى انگليا مەكتەپتەرىندە ۇيالى تەلەفون ۇستاۋعا توسقاۋىل قويدى. ءبىراق تىيىمنىڭ زاڭنامالىق سيپاتى جوق. ديرەكتورلارعا تەك ارنايى نۇسقاۋلىق جىبەرىلدى. سمارتفوناردى ۇيدە قالدىرۋ نەمەسە ۋاقىتشا ءبىر جەرگە قويا تۇرۋ كەرەك ەكەنىن مەكتەپتەردىڭ وزدەرى شەشەدى.

- مەن - قازاقپىن. اتا- انام لوندوندا ۋاقىتشا جۇمىس ىستەپ جاتىر. ءبىز مەكتەپتە وسىنداي شۇبەرەك قالتاعا تەلەفونىمىزدى سالامىز. ول قۇلىپتانادى. تەك قانا اپايىمىز ساباقتان كەيىن اشىپ بەرەدى، - دەيدى ەليزابەت گاررەت اندەرسون اتىنداعى مەكتەپتىڭ وقۋشىسى.

ونلاين پلاتفورمالاردى باقىلاۋمەن اينالىساتىن Ofcom كومپانياسىنىڭ مالىمەتتەرىنشە، 12 جاسقا دەيىنگى بالالاردىڭ 97 پايىزىندا سمارتفون بار. بۇل وقۋشىنىڭ ويىن ءبولىپ قانا قويماي، كيبەربۋللينگكە ۇشىراتىپ، الەۋمەتتىك تەڭسىزدىك تۋعىزۋى مۇمكىن. ءبىلىم ءمينيسترى مەكتەپ ديرەكتورلارىمەن كەڭەسىپ، ماسەلەگە نۇكتە قويدى.

- بالالار مەكتەپكە وقۋعا، دوستىق قارىم- قاتىناس ورناتۋعا بارادى. ادامدارمەن ارالاسۋدى ۇيرەنەدى. ولار ۇنەمى ۇيالى تەلەفوندا وتىرماۋى كەرەك. حابارلاما جىبەرىپ، حات الماسۋدىڭ ورنىنا قاتارلاستارىمەن اڭگىمەلەسسىن، - دەيدى ۇلىبريتانيانىڭ ءبىلىم ءمينيسترى دجيلليان كيگان.

سونداي- اق زياندى كونتەنتتىڭ بالالارعا قولجەتىمدى بولعانى كوپشىلىكتى الاڭداتادى. مارقۇم برياننانىڭ اناسى ەستەر دجاي تەحنولوگيالىق كومپانيالاردى جاسوسپىرىمدەردىڭ الەۋمەتتىك جەلىلەرگە كىرۋىنە تىيىم سالۋعا شاقىردى. ونىڭ قىزى كيبەربۋللينگتىڭ قۇربانى بولعان. ساياباقتا قۇرداستارى برياننانى پىشاقتاپ تاستاعان. قىلمىسكەرلەر اسا قاتىگەزدىكپەن ادام ولتىرگەنى ءۇشىن 20 جىلعا سوتتالدى.

- مەن تەحنولوگيالىق كومپانيالاردى وسكەلەڭ ۇرپاقتىڭ جاعدايىن ويلاپ، بولاشاعىنا اسا جاۋاپكەرشىلىكپەن قاراۋعا شاقىرار ەدىم. ولاردان 16 جاسقا تولماعان بالالارعا الەۋمەتتىك جەلىلەرگە كىرۋگە توسقاۋىل قوياتىن ۇيالى تەلەفوندار شىعارۋدى سۇرايمىن. مەنىڭ قىزىمدى و دۇنيەلىك ەتكەندەر قىلمىسقا بارماس بۇرىن زورلىق- زومبىلىق جاساۋدى ءدال سول جەردە ۇيرەنگەن، - دەيدى قايتىس بولعان ءجاسوسپىرىمنىڭ اناسى ەستەر دجاي.

13 بەتتەن تۇراتىن نۇسقاۋلىقتا مەكتەپ مۇعالىمدەرىنە دە سمارتفون ۇستاۋعا توسقاۋىل قويىلعان. ەگەر جۇمىسىنا اسا قاجەت بولماسا پايدالانبايدى. اتا- انالار وقۋشىلارمەن تىكەلەي تەلەفون ارقىلى ەمەس، مەكتەپ كەڭسەسى ارقىلى بايلانىسۋى كەرەك. قوعام بەلسەندىلەرى بۇل باستامانىڭ بەرەرى از دەپ ەسەپتەيدى.

- بالالار تەلەفوندى كوبىنە مەكتەپتەن تىس ۋاقىتتا پايدالانادى. كوپتەگەن وقۋ ورىنىندا سمارتفوندارعا توسقاۋىل بۇرىننان قويىلعان. ءبىلىم بەرۋ سالاسىنداعى باسقا ماسەلەلەرمەن باس قاتىرۋ كەرەك، - دەيدى مەكتەپ جانە كوللەدج باسشىلارى قاۋىمداستىعىنىڭ باس حاتشىسى دجەفف بارتون.

ۇلى بريتانيادا سمارتفونعا وقۋدان تىس ۋاقىتتا دا تولىق تىيىم سالىنعان مەكتەپتەر بار. مۇعالىمدەردىڭ، اتا- انالاردىڭ جانە وقۋشىلاردىڭ ايتۋىنشا، بۇل وتە ءتيىمدى ءادىس. كوبىنە تەلەفون قاۋىپسىزدىكتىڭ كەپىلى بولا بەرمەيدى، كەرىسىنشە، ينتەرنەتتەگى زياندى كونتەنتكە جول اشىپ، الەۋمەتتىك تەڭسىزدىككە الىپ كەلەتىنىن ايتادى ساراپشىلار.

اۆتور

عالىمجان قارامان ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى