ۆانۋاتۋداعى جەر سىلكىنىسىنەن 14 ادام قازا تاپتى
استانا. KAZINFORM - ۆانۋاتۋ استاناسى پورت-ۆيلا قالاسىندا 7,3 بالدىق جەر سىلكىنىسى بولدى. كەمىندە 14 ادام قازا تاۋىپ، 200 گە جۋىق ادام جاراقات الدى، دەپ جازادى BBC.
جەر سىلكىنىسى سەيسەنبى كۇنى جەرگىلىكتى ۋاقىت بويىنشا ساعات 12:47 دە بولدى. توتەنشە جاعدايلاردى باسقارۋ ۇكىمەتىنىڭ مالىمەتىنشە، پورت ۆيلادا كەم دەگەندە 10 عيمارات زاقىمدانعان. جەر سىلكىنىسىنەن كەيىنگى دۇمپۋلەر ەلەكتر قۋاتى مەن ۇيالى تەلەفون بايلانىسىنىڭ ۇزىلۋىنە سەبەپ بولدى.
ۆانۋاتۋداعى ىسكەرلىك كەڭەسىنىڭ ءتوراعاسى گلەن كرەيگ ءبىر عيمارات ەرەكشە زاقىمدانعانىن، وندا بىرنەشە ەلشىلىكتەر، سونىڭ ىشىندە اقش ەلشىلىگى مەن ۇلىبريتانيانىڭ جوعارعى كوميسسياسى ورنالاسقانىن ايتتى.
جەرگىلىكتى تۇرعىنداردىڭ ايتۋىنشا، تۇندە بىرنەشە رەت جەر سىلكىنىسى بولىپ، كوشكىننىڭ جۇرۋىنە سەبەپ بولعان. التى ادام كوشكىننەن قازا تاپتى، تاعى ءتورت ادام جەر سىلكىنىسى كەزىندە قۇلاعان عيماراتتا بولعان.
- قازا بولعان 14 ادامنىڭ ەكەۋى قىتاي ازاماتتارى، - دەپ حابارلادى قىتايدىڭ ۆانۋاتۋداعى ەلشىسى لي مينگان.
زارداپ شەككەندەر سانى ارتۋى مۇمكىن. قۇتقارۋشىلار جەر سىلكىنىسى سالدارىنان عيماراتتاردا قالىپ قويعان ادامداردى شىعارۋ جۇمىستارىن جۇرگىزىپ جاتىر.
- قالادا قۇتقارۋ جۇمىستارى جۇرگىزىلىپ جاتقان كەزدە قوعامدىق قوزعالىستى شەكتەۋ ءۇشىن جەتى كۇندىك توتەنشە جاعداي جاريالاندى، - دەپ حابارلادى جەرگىلىكتى پوليتسيا.
ەسكە سالساق، تىنىق مۇحيتىندا ۆانۋاتۋ ماڭىندا قۋاتتى جەر سىلكىنىسى بولعانى انىقتالدى.
