امەريكالىق كومپانيا قىتايداعى ءوندىرىسىن ءۇندىستانعا شۇعىل كوشىرىپ جاتىر

Bloomberg اگەنتتىگىنىڭ حابارلاۋىنشا، 2024 -جىلدىڭ ناۋرىزىنا دەيىن ءۇندىستاندا 22 ميلليارد دوللاردىڭ iPhone سمارتفوندارى قۇراستىرىلعان، بۇل وتكەن جىلمەن سالىستىرعاندا شامامەن %60- عا كوپ.

Apple قازىرگى تاڭدا iPhone قۇرىلعىلارىنىڭ %20- ىن (ءاربىر بەسىنشى تەلەفون) ءۇندىستاندا شىعارادى. بۇل كورسەتكىشتەر iPhone ءوندىرۋشىسىنىڭ جەتكىزۋشىلەرىمەن بىرگە قىتايدان ءۇندىستانعا جۇيەلى كوشۋ ءۇردىسىن كۇشەيتىپ جاتقانىن كورسەتەدى. مۇنداي باعىت پاندەميا كەزىندە قىتايداعى قاتاڭ شەكتەۋلەرگە بايلانىستى تۋىنداعان وندىرىستىك ۇزىلىستەن كەيىن باستالعان.

قازىرگى ۋاقىتتا ءۇندىستاندا وندىرىلەتىن iPhone-داردىڭ كوپشىلىگى ەلدىڭ وڭتۇستىگىندە ورنالاسقان Foxconn زاۋىتىندا قۇراستىرىلادى.

Apple كومپانياسى بۇل ماسەلەگە قاتىستى رەسمي تۇسىنىكتەمە بەرگەن جوق.

ءۇندىستاننىڭ تەحنولوگيا ءمينيسترى وتكەن اپتادا (8-ءساۋىر) مالىمدەگەندەي، ەل 2025 -جىلدىڭ ناۋرىزىنا دەيىن 1,5 تريلليون رۋپييگە تەڭ iPhone ەكسپورتتاعان. دەرەككوزدەردىڭ ايتۋىنشا، ا ق ش پرەزيدەنتى دونالد ترامپتىڭ اقپاندا جاريالاعان «تەڭەستىرىلگەن كەدەن سالىعى» باستاماسىنان كەيىن، ءۇندىستاننان ا ق ش- قا iPhone جەتكىزىلىمى ايتارلىقتاي جىلدامداعان.

11- ساۋىردە ترامپ اكىمشىلىگى سمارتفوندار مەن كومپيۋتەرلەردى قوسا العاندا ءبىرقاتار ەلەكترونيكا ونىمدەرىن كەدەندىك باج سالىعىنان بوساتۋ تۋرالى شەشىم قابىلدادى. بۇل Apple مەن NVIDIA سياقتى كومپانيالار ءۇشىن وڭ جاڭالىق بولدى. الايدا بۇل شەشىم قىتايعا باعىتتالعان نەگىزگى تاريفتەرگە اسەر ەتپەيدى - قىتايعا سالىنعان جيىنتىق باج سالىعى قازىرگى تاڭدا %145- عا جەتكەن.

سونىڭ ناتيجەسىندە، قازىرگى كەزدە ءۇندىستاندا وندىرىلگەن iPhone قۇرىلعىلارىنا ا ق ش- تا ەشقانداي قوسىمشا سالىق سالىنبايدى. ال قىتايدان ەكسپورتتالاتىن ونىمدەرگە سالىناتىن جوعارى تاريفتەر Apple سەكىلدى كومپانيالاردى وندىرىستىك تىزبەكتى بالاما نارىقتارعا كوشىرۋگە يتەرمەلەۋى مۇمكىن.

بۇعان دەيىن Apple كومپانياسى يندونەزيادا iPhone 16 سمارتفوندارىن ساتۋعا قايتا رۇقسات العانىن جازعان بولاتىنبىز.

اۆتور

دانا نۇرباقىت

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى