امەريكا داۋىسى قىزمەتكەرلەرى مەن كاسىپوداقتار ترامپ اكىمشىلىگىن سوتقا بەردى
استانا. KAZINFORM - «امەريكا داۋىسى» قىزمەتكەرلەرى مەن ولاردىڭ كاسىپوداقتارى جۇما كۇنى ا ق ش پرەزيدەنتى دونالد ترامپ اكىمشىلىگىنە قارسى سوتقا شاعىم ءتۇسىردى، دەپ حابارلايدى شينحۋا.
ولار ا ق ش قارجىلاندىراتىن بۇقارالىق اقپارات قۇرالدارىنىڭ جابىلۋى ءبىرىنشى تۇزەتۋمەن كەپىلدىك بەرىلگەن قۇقىقتارىن بۇزادى دەپ مالىمدەيدى.
نيۋ-يوركتەگى ا ق ش وكرۋگتىك سوتىنا بەرىلگەن شاعىمدا جاۋاپكەرلەر رەتىندە ا ق ش-تىڭ جاھاندىق بۇقارالىق اقپارات قۇرالدارى اگەنتتىگى (USAGM)، ونىڭ ۋاقىتشا ديرەكتورى ۆيكتور مورالەس جانە ارنايى كەڭەسشى كاري لەيك اتالعان.
شاعىمدانۋشىلاردىڭ قاتارىندا «امەريكا داۋىسى» جۋرناليستەرى، «شەكاراسىز رەپورتەرلەر» جانە بىرنەشە كاسىپوداقتار بار. ولار دونالد ترامپ اكىمشىلىگىنىڭ 1300-دەن استام قىزمەتكەردى اقىسىز دەمالىسقا جىبەرىپ، بىرنەشە جاڭالىق رەسۋرستارىنىڭ قارجىلاندىرۋىن قىسقارتۋى كونستيتۋتسياعا قايشى ءارى زاڭسىز ارەكەت بولدى دەپ سانايدى.
شاعىم USAGM-نىڭ جابىلۋى تۋرالى شەشىمدى جويۋدى تالاپ ەتەدى. بۇل اگەنتتىك «امەريكا داۋىسى» مەن باسقا دا ب ا ق-تى، سونىڭ ىشىندە «ازات ەۋروپا/ازاتتىق راديوسى» جانە «ازات ازيا راديوسىن» قارجىلاندىرادى.
بۇعان دەيىن ترامپ جەتى فەدەرالدى اگەنتتىكتە، سونىڭ ىشىندە «ازاتتىق راديوسى» مەن «امەريكا داۋىسىنا» جاۋاپتى USAGM-دە قىسقارتۋ جۇرگىزۋدى بۇيىرعانى حابارلانعان.
