امال جوعىنان بالاسىن ورىس مەكتەپتەرىنە بەرۋگە ءماجبۇر. اقمولادا ون مەكتەپ جابىلىپ قالعان
كوكشەتاۋدا مەكتەپتەردە بالا سانىنىڭ كوپتىگىنەن عيماراتتار تارشىلىق بولىپ، ءۇزىلىس كەزىندە №1-قالالىق ورتا مەكتەبىنىڭ دالىزىندە وقۋشىلاردىڭ قىسىلىپ قالعانى تۇتاس ەلدى دۇرلىكتىرسە، وبلىستىڭ شالعاي اۋىلدارىندا كەرىسىنشە مەكتەپتەر جابىلىپ جاتىر.
وڭىردە بالا سانىنىڭ از بولۋىنا بايلانىستى شالعاي اۋىلداردا 7 باستاۋىش جانە 3 بىردەي نەگىزگى مەكتەپ جابىلىپ تىنعان. مۇنىمەن قوسا 10 شاعىن جيناقتى مەكتەپ، ونىڭ ىشىندە 2 ورتا مەكتەپ نەگىزگى مەكتەپكە، ال جەتەۋى باستاۋىش مەكتەپكە اينالعان.
بۇل اۋىل ادامدارىنىڭ قالاعا كوشىپ كەتۋى سەبەبىنەن بولعان. اۋىل تۇرعىندارى اسىرەسە قازاق مەكتەپتەرىنىڭ قىسقارىپ جاتقانىنا الاڭداۋشىلىق ءبىلدىردى. ويتكەنى وڭىردەگى اۋىلدى ايماقتارداعى 537 مەكتەپتىڭ تەك 67 پايىزى عانا مەملەكەتتىك تىلدە ءبىلىم بەرەتىن بولىپ شىقتى.
«بالالاردىڭ كوپشىلىگى اسىرەسە قاراكوز قازاق بالالارىنىڭ ورىس تىلىندە وقىپ جاتقانىنا الاڭدايمىز. قازاق مەكتەپتەرى از بولعاندىقتان جۇرت امالدىڭ جوقتىعىنان بالاسىن ورىس مەكتەپتەرىنە بەرۋگە ءماجبۇر. سونىمەن قاتار اۋىلداردا بالا سانى از بولعاندىقتان سىنىپ كومپلەكتىلەرى تولماي ەكى سىنىپ بىرگە وقىتىلادى. بۇل بالانىڭ ءبىلىم الۋىنا دا كەدەرگى كەلتىرەدى عوي»، - دەيدى ايدار قالىمبەتوۆ ەسىمدى زەرەندى اۋدانى تۇرعىنى.
وبلىستاعى ءبىلىم وشاقتارىنىڭ جابىلۋىنىڭ سالدارىنان وڭىردە ون مىڭعا جۋىق بالالار ءوز اۋىلدارىندا مەكتەپ بولماعاندىقتان كورشى اۋىلدارعا قاتىناپ وقيتىن بولىپ شىقتى. وبلىستىق ءبىلىم باسقارماسىنىڭ مالىمەتىنشە ولاردىڭ ءبارى كۇندەلىكتى تاسىمالداۋمەن قامتىلعان.
«وسى جىلدىڭ ءبىرىنشى قىركۇيەگىندەگى مالىمەت بويىنشا وبلىستا 9797 وقۋشىعا تاسىمالداۋ ۇيىمداستىرىلعان. مەكتەبى جوق اۋىلداردا ينتەرناتتا ءبىلىم الاتىن 179 بالا اپتا سايىن، سونىمەن قاتار مەكتەبى جوق اۋىلداردا تۇراتىن 4940 بالا مەن ەلدىمەكەن ىشىندەگى 4682 وقۋشى كۇندەلىكتى تاسىمالداۋمەن قامتاماسىز ەتىلگەن»، - دەيدى اقمولا وبلىسى ءبىلىم باسقارماسىنىڭ باسپا ءسوز قىزمەتىنەن.
جالپى وڭىردەگى قازاق سىنىپتارىنا ءبىرىنشى سىنىپقا بارعان بالالاردىڭ سانى اسا ءماز ەمەس. قازاق مەكتەپتەرىنە جالپى سانى 7341 بالا بارسا، 7051 بالا ورىس مەكتەبىنە بارعان.
Massaget.kz
