اليمەنتتىك جانە نەسيەلىك قارىزى بارلارعا قۇمار ويىنعا ءباس تىگۋ قۇقىعى شەكتەلەدى
استانا. KAZINFORM - قارىزى بار ازاماتتاردىڭ قۇمار ويىنعا ءباس تىگۋ قۇقىعى شەكتەلەدى. بۇل تۋرالى پارلامەنت ماجىلىسىندە ويىن بيزنەسى تۋرالى زاڭ جوباسىن تانىستىرۋ كەزىندە ءماجىلىس دەپۋتاتى ەلنۇر بەيسەنبايەۆ ايتتى.
«وتەلمەگەن اليمەنتتىك جانە نەسيەلىك قارىزى بار ازاماتتاردىڭ قۇمار ويىنعا ءباس تىگۋ قۇقىعى شەكتەلەدى. ياعني بورىشكەرلەردىڭ ءبىرىڭعاي رەەسترىندە مالىمەتتەرى بار 25 جاسقا دەيىنگى جەكە تۇلعالاردى قۇمار ويىندارعا جانە ءباس تىگۋگە جىبەرۋگە تىيىم سالۋ بەلگىلەنەدى»، - دەدى ە. بەيسەنبايەۆ.
دەپۋتات قارىزدارى بار ادامداردىڭ ءتيىستى ءتىزىمى قامتىلعان سايت بار ەكەنىن ەسكە سالدى.
«ماسەلەن، بانككە بارىپ، نەسيە راسىمدەۋ كەزىندە ءار ادامنىڭ كرەديت الۋ دەرەكتەرى قاراستىرىلادى. ءدال سولاي بورىشكەرلەر تۋرالى اقپارات جۇيەدە بار. قارىزى بار ادام ءوزىنىڭ كارتاسى (قۇمار ويىنعا) ارقىلى تولەم جاساماق بولسا، ونىڭ تولەمدەرىنە شەكتەۋ قويىلادى»، - دەدى ول.
بۇدان بۇرىن حابارلانعانداي، بۇگىن پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى.
