پاۆلودارداعى كولونيادا حالال سابىن جانە سپورت كيىمدەرى وندىرىلە باستادى
پاۆلودار. KAZINFORM - پاۆلودارداعى №46-مەكەمەدە قويدىڭ مايىنان حالال سابىن ءوندىرىسى مەن Tauba برەندى بويىنشا سپورتتىق كوستيۋمدەر تىگەتىن بىرەگەي جوبا ىسكە قوسىلدى.
بۇل جوبا سوتتالعاندار ءۇشىن جاڭا جۇمىس ورىندارىن قۇرىپ قانا قويماي، جەرگىلىكتى ءوندىرىستى قولداۋ مەن تۇراقتى دامۋعا باعىتتالعان.
تابيعي قوسپالاردان دايىندالعان كىر سابىن حالال ستاندارتى تالاپتارىنا تولىق سايكەس كەلەدى. سوعان وراي تۇتىنۋشىلار اراسىندا سۇرانىسقا يە بولادى دەگەن سەنىم زور. ال Tauba برەندى بويىنشا تىگىلەتىن سپورتتىق كوستيۋمدەر ساپا مەن ءستيلدى ۇيلەستىرىپ، سوتتالعاندارعا ءوز شىعارماشىلىق قابىلەتتەرىن كورسەتۋگە دە مۇمكىندىك بەرىپ وتىر. ولار بۇل داعدىلارىن ەرتەڭ بوستاندىققا شىققاندا ءارى قاراي شيراتا تۇسەرى انىق.
«ءبىز بۇل ءتاسىلدىڭ قاماۋداعى ادامدارعا قاتىستى كوزقاراستى وزگەرتۋگە كومەكتەسەتىنىنە سەنىمدىمىز. جوبالارىمىز سوتتالعانداردى وڭالتۋ مەن الەۋمەتتەندىرۋگە، سونداي- اق نارىقتا سۇرانىسقا يە ونىمدەردى وندىرۋگە باعىتتالعان»، - دەيدى مەكەمە باسشىسى سۇلتان باكين.
وندىرىلگەن ونىمدەر جەرگىلىكتى جانە ۇلتتىق نارىقتاردا قولجەتىمدى بولادى. بۇل سوتتالعانداردىڭ ەڭبەككە ورنالاسۋ جانە ءوزىن-ءوزى جۇزەگە اسىرۋ مۇمكىندىكتەرىن ارتتىرادى. بۇل جوبالاردىڭ ىسكە قوسىلۋى ينكليۋزيۆتى جانە الەۋمەتتىك باعىتتالعان قوعام قۇرۋ جولىنداعى قادام دەپ باعالانىپ وتىر.
ەسكە سالا كەتەيىك، س ق و-دا تۇرمەدەگىلەر ومارتاشى جانە جىبەك قۇرتىن ءوسىرۋشى ماماندىقتارىن مەڭگەرەدى.
