پاۆلوداردا قامشى ءورۋ ونەرى جاڭعىردى

بۇقار جىراۋ اتىنداعى ادەبيەت جانە ونەر مۋزەيى مەكتەپ وقۋشىلارىنىڭ قولونەرگە دەگەن قىزىعۋشىلىعىن ارتتىرۋعا دەن قويىپ كەلەدى.

- سايىستى ناۋرىز مەيرامىنا وراي ۇيىمداستىردىق. قامشى ءورۋ ونەرىن ناسيحاتتاۋ ارقىلى ەر بالالاردى ۇلتتىق قولونەردى كۇندەلىكتى ومىردە قولدانا بىلۋگە ۇيرەتۋ، شىعارماشىلىققا جەتەلەۋ، ىزدەنىسىن دامىتۋ، قازاقتىڭ ۇلتتىق ونەرىنە دەگەن جاستاردىڭ زەيىنىن ارتتىرۋ كوزدەلدى، - دەيدى مۋزەي باسشىسى ەربول قايىروۆ.

بايقاۋ ەكى كەزەڭنەن تۇردى. العاشقىسىندا 10 قاتىسۋشى قازىلار القاسىنا ءوزى ءورىپ اكەلگەن قامشىلارىن تانىستىرىپ، جاسالۋ ادىستەرىن باياندادى. ال ەكىنشى كەزەڭگە وتكەن 5 قاتىسۋشى قايىس تاسپالارىنان قامشى ءورۋ شەبەرلىكتەرىن كورسەتتى.

- مەن جاستايىمنان جىلقى باققان اداممىن. حالقىمىز ەجەلدەن جىگىتتىڭ بەس قارۋى بويىندا بولۋى كەرەك دەپ بىلگەن. قامشىنىڭ قاسيەتىن، قولدانۋ ەرەكشەلىگىن ۇلكەندەردەن ۇيرەنىپ، جادىمىزعا ءتۇيىپ وستىك. ماسەلەن، جىلقىشىلار قامشىنىڭ بۇلدىرگىسىن سابىنىڭ ەڭ ۇشىنان سالادى. سەبەبى جىلقىعا بۇعالىق سالۋ كەزىندە قامشىنى سول قولىمىزعا ۇستاۋعا ىڭعايلى، - دەيدى قامشى ءورۋدىڭ شەبەرى، قازىلار القاسىنىڭ مۇشەسى جاڭبىرباي اۋباكىروۆ.

بايقاۋ قورىتىندىسىندا ى. التىنسارين اتىنداعى دارىندى بالالارعا ارنالعان وبلىستىق قازاق گيمنازيا-ينتەرناتىنىڭ 10 -سىنىپ وقۋشىسى بيجان تاسقىن ۇلى جەڭىمپاز اتاندى. پاۆلودار قالاسىنىڭ № 29 ورتا مەكتەبىنىڭ وقۋشىسى سامات نۇرسۇلتان ەكىنشى، ءاليحان بوكەيحان اتىنداعى ليتسەي-مەكتەبىنىڭ وقۋشىسى قابدولبەك ايات ءۇشىنشى ورىنعا يە بولدى.

ەسكە سالا كەتەيىك، كوكشەتاۋدا ۇلتتىق كيىم فەستيۆالى ءوتتى.

اۆتور

مۇرات اياعان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى