پاۆلودار وبلىسىندا قىستاقتارعا ءبىر ميلليوننان اسا مال كىردى

وڭىردەگى فەرمەرلەر مەن جەكە تۇرعىنداردىڭ قىستاقتارىندا 456 مىڭ قارا مال، 623 مىڭ قوي مەن ەشكى بار.

- بيىل جازدا جەم- ءشوپ دايىندالعان شابىندىقتار اۋماعى 281 مىڭ گەكتاردى قۇراپ، وتكەن جىلعىدان 19 مىڭ گەكتارعا ارتىق بولدى. ناتيجەسىندە فەرمەرلەرىمىز ءبىر جارىم جىلعا جەتەتىن مال ازىعىن قامداپ الدى دەسە بولادى. شامامەن 1 ميلليون 835,6 مىڭ توننا ءشوپ شابىلىپ، جوسپار ارتىعىمەن ورىندالدى. بۇعان قوسا 112,3 مىڭ توننا پىشەندەمە، 182 مىڭ توننا سۇرلەم، 317 مىڭ توننا سابان دايىندالدى. شابىندىقتاردا مايالانعان ءشوپتىڭ 91 پايىزى قىستاقتارعا جەتكىزىلدى، - دەپ حابارلادى Kazinform تىلشىسىنە پاۆلودار وبلىسى اۋىل شارۋاشىلىعى باسقارماسى باسشىسىنىڭ ورىنباسارى تولەگەن كوشەربايەۆ.

ايماقتاعى ءىرى قارا مالدىڭ 17,6 پايىزى اسىل تۇقىمدى. اسىل تۇقىمدى سيىرلاردى وسىرۋمەن 16 -دەن استام شارۋاشىلىق اينالىسادى. ەت باعىتىندا - قازاقتىڭ اقباس سيىرى، گەرەفورد، ابەردين- انگۋس، اۋليەكول تۇقىمدارى، ءسۇت باعىتىندا سيممەنتال، گولشتين، قىزىل دالا تۇرلەرى ءوسىرىلىپ وتىر. ال ۇساق مالداردىڭ 3,9 پايىزى، جىلقىنىڭ نەبارى 2,4 پايىزى عانا اسىل تۇلىك بولىپ سانالادى.

ستاتيستيكالىق دەرەكتەر ايماقتاعى ءىرى قارانىڭ ازايعانىن كورسەتىپ وتىر. 2022 -جىلى وڭىردە 527,8 مىڭ تۇلىك سانالسا، قازىرگى ۋاقىتتا ولاردىڭ سانى 467 مىڭنان ءسال اسادى. ال جىلقى سوڭعى ەكى جىلدا 58 مىڭعا وسكەن. وبلىستا تۇيەمەن اينالىساتىن شارۋاشىلىقتار دا كوبەيە تۇسكەن. 2022 -جىلى ايماقتا زەڭگى بابا تۇقىمىنىڭ 32 تۇلىگى تىركەلسە، بۇگىندە ولاردىڭ سانى 150 گە جۋىقتاپ قالعان.

ەسكە سالا كەتەيىك، پاۆلوداردا ەرتىس وزەنىنىڭ دەڭگەيى كوتەرىلىپ، شارۋالار جايىلماداعى شوپتەرىن جەتكىزە الماي وتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى