پاۆلودار وبلىسىندا 18 ءۇي سۋ استىندا قالدى
پاۆلودار. KAZINFORM - جەدەل شتابتىڭ اقپارىنشا، ءوڭىر بويىنشا پاۆلودار، اقتوعاي، جەلەزين، ۋسپەن، ەرتىس جانە تەرەڭكول اۋداندارىنداعى جەكەلەگەن ۇيلەردى سۋ باسقان. جالپى سانى 8 ۋچاسكە باقىلاۋدا تۇر. وڭىردە قارعىن سۋ جۇرە باستاعالى جالپى سانى 18 ءۇي سۋ استىندا قالعان.
«قازىرگى ۋاقىتتا 5 ۇيدەن سۋ سورىپ شىعارىلدى، 13 ۇيدە جۇمىستار جالعاسىپ جاتىر. ولار - اقتوعاي اۋدانىنىڭ جالاۋلى اۋىلىندا، ۋسپەن اۋدانىنىڭ ۋسپەن جانە ۆوزنەسەنكا اۋىلدارىندا، اققۋلى اۋدانىنىڭ قازى اۋىلىندا. سۋ كىرگەن 18 ۇيدە جالپى سانى 88 تۇرعىن بار. ت ج د كۇشىمەن اقتوعاي اۋدانىنىڭ جالاۋلى اۋىلىنان 2 وتباسى (9 ادام) كوشىرىلدى. ولار ۋاقىتشا تۋىستارىنىڭ ۇيلەرىن پانالاي تۇرادى. بارلىق زارداپ شەككەندەرگە الەۋمەتتىك جانە ماتەريالدىق كومەك كورسەتىلەدى»، دەپ حابارلادى پاۆلودار وبلىسى اكىمىنىڭ باسپا ءسوز قىزمەتىنەن.
ەكى رەسپۋبليكالىق، ءۇش وبلىستىق ماڭىزى بار اۆتوجولداردىڭ ۇستىنە سۋ جايىلعان. قۇتقارۋشىلار جولداردىڭ جيەگىن بەكىتىپ جاتىر. ازىرشە كولىك قاتىناسى ۇزىلگەن جوق.
سۋ تاسقىنىنا قارسى ءىس-شارالارعا 446 ادام، 98 بىرلىك تەحنيكا، 85 موتوپومپا، 2 ءجۇزۋ قۇرالى جۇمىلدىرىلدى. ءۇش تاۋلىك ىشىندە 160 مىڭ تەكشە مەتردەن استام سۋ سورىلدى، 3,5 مىڭ توننا ينەرتتى ماتەريال توگىلىپ، 6 مىڭعا جۋىق قاپ توسەلدى.
وڭىردە تاۋلىك بويى جۇمىس ىستەيتىن وبلىستىق شتاب جۇمىس ىستەپ تۇر.
اۆتور
مۇرات اياعان
