پاۆلودار تۇرعىنى ساقتاندىرۋ كومپانياسىنان 13 ميلليون تەڭگەدەن استام وتەماقى ءوندىرىپ الدى
پاۆلودار. قازاقپارات - 2023 -جىلى پاۆلودار قالاسىنىڭ تۇرعىنى TI باعدارلاماسى بويىنشا ساقتاندىرۋ كومپانياسىمەن كولىك قۇرالىن ەرىكتى ساقتاندىرۋ شارتىن جاساعان. وعان «تويوتا» ماركالى اۆتوكولىكتىڭ ساقتاندىرۋ پوليسى راسىمدەلگەن.
الايدا ءبىر ايدان كەيىن ەر ادام جول-كولىك وقيعاسىنا ءتۇسىپ، ساقتاندىرۋ جاعدايى تۋرالى ساقتاندىرۋ كومپانياسىنا ارىز جولداعان. ساقتاندىرۋ كومپانياسى جەكە كاسىپكەردىڭ قورىتىندىسىنا سۇيەنە وتىرىپ، ساقتاندىرۋ جاعدايى جالعان ەكەنىن كورسەتىپ، وعان ساقتاندىرۋ تولەمىن تولەۋدەن باس تارتقان.
ەر ادام سوتقا جۇگىنىپ، ساقتاندىرۋ كومپانياسىنىڭ باس تارتۋىن زاڭسىز دەپ تانۋدى جانە 13 ميلليون تەڭگەدەن استام ساقتاندىرۋ تولەمدەرىن ءوندىرۋدى سۇراعان. ءبىرىنشى ساتىداعى سوت تاراپتاردىڭ جول- كولىك وقيعاسىنىڭ ءمان- جايىنا قاتىستى قاراما- قايشى ۇستانىمدارىن ەسكەرە وتىرىپ، سوت- ىزدەستىرۋ ساراپتاماسىن تاعايىنداعان. ونىڭ قورىتىندىسىنان اۆتوكولىككە كەلتىرىلگەن زالال اتالعان جول-كولىك اپاتىنىڭ سالدارىنان بولۋى مۇمكىن ەكەندىگى انىقتالعان.
وسىعان بايلانىستى تالاپ قويۋ تولىق كولەمدە قاناعاتتاندىرىلعان. ال ساقتاندىرۋ كومپانياسى بۇل شەشىمگە اپەللياتسيالىق سوتقا شاعىم تۇسىرگەن.
- پاۆلودار وبلىستىق سوتى ءىستى زەرتتەي كەلە، سوت ساراپتامانىڭ قورىتىندىسى ءىس ماتەريالدارىنا، اكىمشىلىك ىسكە جانە كۋالەردىڭ ايعاقتارىنا سايكەس كەلەتىنىن انىقتادى. تالاپ قويۋشىنىڭ اۆتوكولىگى پوليتسيا قىزمەتكەرلەرىنىڭ قاتىسۋىمەن جول- كولىك وقيعاسى ورنىنان ۋاقىتشا ۇستاۋ يزولياتورىنا جەتكىزىلگەن، بۇل راستالدى. ساقتاندىرۋ كومپانياسى ساقتاندىرۋ تالابىن بۇرمالاۋ تۋرالى ءوز دالەلدەرىن راستايتىن دالەلدەمەلەردى ۇسىنعان جوق. اپەللياتسيا ءبىرىنشى ساتىداعى سوتتىڭ شەشىمىن وزگەرىسسىز قالدىردى، - دەپ حابارلادى وڭىرلىك سوتتىڭ باسپا ءسوز قىزمەتىنەن. قاۋلى زاڭدى كۇشىنە ەندى.
